Shillong, Naitung 13
U Lionel Messi u la pynjlan ïa la ka rekod ha ka Major League Soccer da kaba thep bun tylli ki kol ha ki san tylli ki jingïalehkai bad ha ka sngi Saitjaiñ u la lah ban thep sa ar kol na ka bynta ban pynlong ïa ka Inter Miami ban jop ïa ka Nashville da 2-1 kol.
Une u khlur ïalehkai shakhmat ka Argentina u la lah ban thep mar shi kol ha ka kylla step bad kylla miet na ka bynta ban ïaryngkat bad u Sam Surridge ka Nashville uba don ha kliar duh jong ka thup nongthep kol ha ka MLS da kaba thep 16 kol ha ki 16 tylli ki jingïakhun.
U Messi, u la thep ar kol ha manla kawei-pa-kawei na san tylli ki jingïalehkai, ha kaba u la sdang naduh ba u la jop ïa ka Montreal bad Columbus ha u Jymmang, shwa ba un leit ïakhun ha ka Club World Cup.
Une u rangïalehkai ba 38 snem ka rta u la thep shisien na ki saw tylli ki jingïalehkai ha kaba ka Miami ka la rung pre-quarter final jong ka Club World Cup, ha shwa ba un wanphai biang sha ka MLS da kaba thep biang sa ar kol pyrshah ïa ka Montreal, ka New England Revolution bad mynta ïa ka Nashville.
U la sdang ban thep ïa ka kol kaba nyngkong ha Fort Lauderdale lyngba ka free-kick haba la poi sha kaba bynta ba don ki rangïalehkai ka Nashville hadien 17 minit.
U Hany Mukhtar u la pynïakhaid na ka bynta ka Nashville hadien saw minit ba la bteng ïa ka jingïakhun jong ka kylla miet, hynrei u Messi u la pynbud biang ïa ka bol kaba ar hadien ba ka lait na u nongapkol ka Nashville u Joe Willis bad ban thep ha ka minit kaba 62.
Lyngba kane ka nam jop ka Miami ka la don ha ka kyrdan basan ha ka Eastern Conference, hynrei ka dangduna sa san point na ka Philadelphia kaba dingbat ï aka kyrdan ba hakhlieh jong kane ka lympung bad ka dangsah salai sien ïakhun.
