Guwahati, Naitung:
Ka kynhun National Investigation Agency (NIA) ha ka sngi Thohdieng ka la mudui mukotduma pyrshah ïa ki san ngut ki briew ha kaba ïadei bad ka mukotduma kurup ïa ka jaka buh tiar siat kaba la ñiew beaiñ kaba heh bha ha Mizoram.
Kumba la ïathuh, la ong ba kine ki tiar ïaleh la pynshisha ba ki dei kiba la thmu ban pynbiang sha ka United Peoples Democratic Front (UPDF) kaba dei ka kynhun lehnoh kaba don ha ka thaiñ Chittagong jong ka ri Bangladesh.
Kine kiba la shah kynnoh ki dei kiba la tip kyrteng kum u Lalbiakchunga ba la tip ruh da ka kyrteng kum u Divid bad kum u David, u Lalthawmcheuva ba la tip ruh da ka kyrteng kum u Thawma, u Malsawma ba la tip kum u Malsawma Loncheu, u Rualliansanga ba la tip kum u Sanga, bad u Alok Bikash Chakma. Ïa ka mukotduma la mudui hakhmat ka ïingbishar ba kyrpang ha Aizawl.
Katkum ka jingïathuh jong ka kynhun NIA, ïa kitei ki briew kiba shahkem la pynngat ha ki kyndon ba ïadei jong ka Bharatiya Nyaya Sanhita (BNS) 2023, ka Unlawful Activities (Prevention) Act (UAPA), 1967, ka Arms Act, 1959, bad ka Foreigners Act, 1946.
Ïa kane ka mukotduma la mudui nyngkong da ki pulit ka Mizoram ha ka 15 tarik, Kyllalyngkot, 2025. Ka kynhun NIA ka la shimti ïa ka jingkhmih bniah ïa kane ka mukotduma hadien ar bnai bad ka la lap ïa ka jingïasuhbuit ba la donkti ha ka jingshalan ïa ki tiar siat bad ki kuli sha ka UPDF.
