Shillong, Naitung 13
Ka prokram jied nongïalehkai athletics na ka bynta ban pynkhreh ïa ka 39th National Games 2027, ka la long ha ka Sngi Saitjaiñ ha Pa Togan Nengminja Track bad Field Stadium kaba ha Dakopgre, Tura.
Kane ka prokram ka long na ka bynta baroh ki district jong ka Garo Hills naduh ki jingïakop mareh, ki jingïakop kynthih bad ka jingkawang sum ha ka liang ki kynthei bad shynrang.
Ïa kane la pynïaid da ka West Garo Hills District Sports Office ha ryngkat ka jingkyrshan lang da ka Meghalaya Athletics Association.
Kumba ka paw ka MAA ka la lah ban pynlong ïa kane ka prokram jied nongïalehkai athletics ha baroh lai tylli ki jaka jong ka Jylla. Na ka bynta ka East bad West Jaiñtia Hills la la pynlong ha Wahïajer Stadium ha ka 28 tarik u Jylliew mynta u snem, katba na ka bynta ka East Khasi Hills, Eastern West Khasi Hills, Ri Bhoi, South West Khasi Hills bad West Khasi Hills la pynlong ha SAI Training Centre Shillong myn ha ka 5 tarik mynta u bnai.
