
Jerusalem, Naitung:
Katkum ki kaiphod ba la ioh lum da ki wad bniah, la ong ba ki shipai ka Israel ki la pyndonkam ia u bom ba la shna da ka US, uba don ia ka jingheh kaba 500lb (230 kilo) ban siat ia kawei ka ktem lynti ïaid pawnam harud duriaw. Ha ka jingpeit bniah ïa ki jingjot jong ka Al-Baqa Cafe, la lap ba ka Israel ka la pyndonkam da u bom MK-82 General-Purpose uba don ia ka jingkhia kaba haduh 230 kilo ban thombor ïa ki ‘riew paidbah ki bym don jingïada, kynthup ïa ki khynnah, ki kynthei bad ki tymmen kiba don ha kito ki jaka kiba ka Israel ka leit thombor ia ka Hamas.
Ki ‘riew shemphang ki ngeit ba ka jingpyndonkam ia utei u bom uba khlaiñ bor, uba pynmih ia ka jingbthei kaba jur bha bad kaba la wanrah jing julor jur ruh ia kitei ki jaka ba don ki ‘riew paidbah, la ong ba ka long kaba be-aiñ bad ka lah ban long ruh kum kawei na ki kam runar ha ka thma.
Ka aiñ jong ka pyrthei kaba iadei bad ki briew hapoh ki jingiateh jong ka Geneva ka khang ia ki shipai ban pynlong ia ki jinghiar thma kiba pynlong ia ka “jingduhnong kaba shu jia ryngkhat ia ka jingim jong ki riew paidbah” kaba “long palat ne bym iahap bad ka jingmyntoi shipai kaba la khmih lynti.”
Ym duna ia ka 24 ngut ki briew– kynthup ia u nongthoh khubor ba pawnam jong ka thma bad u nongshna phlim na Palestine, u Ismail Abu Hatab, ka nongtrei iing kaba 35 snem ka rta bad uwei u khynnah uba 4 snem ka rta–ki la iap ha katei ka jingshah thombor ha katei ka jaka kaba ju long kaba jyllei bha ha rud duriaw. Napdeng kiba mynsaw ki don uwei u khynnah shynrang ba dang 14 snem ka rta bad kawei ka khynnah kynthei ba dang 12 snem ka rta. Ka jaka jong ka kad liengsuiñ ha kaba ka cafe kaba ar mala ka don kam shym la shah ktah ha kano kano ka jingmaham ban pynkynriah jaka ba la pynmih da ki shipai Israel (IDF) shwa ki kam shipai kiban sa wan.
Ka IDF ka la ong ba ka jingshah thombor ha katei ka cafe ka dang don ha ka jingbishar bniah bad ba “shwa ban shah thombor, la shim ia ki sienjam ban pynduna ia ka jingma ban pynmynsaw ia ki ‘riew paidbah da kaba pyndonkam da ki jingpeitngor na suin”.