Nongpoh, Naitung 13
Ka jingñiah khyllew bad pynher sted da ki nongñiah ar shaka bad ruh katto-katne kiba ñiah saw shaka ha ka surokbah ka Ri Bhoi District kam dei shuh kaba dang thymmai ne kaba dang shu jia mynta-myn-ne, hynrei kaba la jia na ka por sha ka por khamtam ha ka Sngi U Blei.
Kane ka jingñiah khlemakor bad pynher shaba palat pud ban pynlong ïa ka surok bah kum ka jaka ban pyni ïa ki sap ki phong kiba shyrkhei lane ban leh kita ki ‘stunt’ bunsien ka wanrah ruh ïa ki jingmynsaw bad sngewsih ym tang ïa u nongkhyllew ne pynher sted, hynrei ka wanrah ruh ïa ki jingjia ba sngewsih ïa ki nongleit nongwan ba lui-lui.
Ha ka Sngi U Blei, ka 13 tarik u Naitung ruh ka la don ka jingleh khyllew bad pynher kali ar shaka da ki khynnah samla kiba la ju tip bad khot paidbah ruh kum kita ki ‘Chapri’ ha ki bynta jong ka surok bah kaba dang hap hapoh ka jingkhmih jong ka thanat Nongpoh. Ki pulit tang mar ïa ïoh jingtip halor kane ka bynta, ki la pynlong ka jingbuddien bad ïoh ban bat ïa bun ngut na kitei ki khynnah ‘Chapri’ kiba la wan lyngba ka kynhun ban pynlong ïa ka surokbah National Highway 6 kum ka jaka pynher kali bad leh ‘stunt’.
Ha ka jingñiah pynher sted, uwei na ki nongñiah uba la ñiah ïa ka kali ar shaka kaba don ïa u registration number ML05-K-3280 u la leit ban thung khohmoh bad ngat ha ka jingmynsaw kaba jur ryngkat uwei pat uba shong nadien, namar ka jingpynher sted kaba shaba palat bad um lah shuh ban teh lakam ïa la ka kali ar shaka kaba u ñiah bad ïa kine baroh ar ngut la rah noh sha ka jaka ai jingsumar.
Kumba na ka liang ki bor pulit ka Ri Bhoi ki ju ai jingpynshai paidbah na ka por sha ka por ban kiar na kum kine ki jait kam kiba ktah ïa ki paidbah nongleit nongwan, hynrei ka jingkylli ka long ba lano kine ki khynnah samla kiba la khot sin ruh kum kita ki ‘Chapri’ kin sngewthuh bad peiphang ba kane ka jingleh muja bad leh khyllew ka jong ki, ka buh jingma ïa kiba bun ki mynsiew briew? Imat ka por ka la dei ba ki bor pulit ki hap ban leh noh da kaba tyngeh pyrshah ïa kine ki khynnah samla ki bym don ka jingpyrkhat na ka bynta ki nongleit nongwan bad pyndonkam ïa ka surok kum ka jaka shimet ba kin leh ïa kita ki ‘stunt’ bad pynher sted ïa ki kali ki jong ki.
