Shillong, Naitung 13
Ka nongthoh kot ba paw ka Jylla, ka Kong Bijoya Sawian kan shah pynkup burom ha ka jingïalang kaba 3 jong ka ‘Aalekh Foundation Women Achievers’ Awards’ ka ban long ha The Leela Palace, New Delhi ha ka 19 tarik mynta u bnai.
Kane ka nongthoh, ka nongpynkylla ktien bad nongsumar ïa ka lariti, ka dei napdeng 20 ngut ki kynthei kiba la ithuh kyrpang – kiba la shah jied na kylleng ka ri na bynta ka jingwanrah jingkylla ha ki kam bad ka jingktah jong ki ha ki bynta bapher-bapher.
Kane ka khusnam ka ithuh ïa ka jingnoh synñiang ba radbah jong ka Kong Sawian sha ka thoh ka tar ka ri India bad ka jingpynneh-pynsah ïa ka lariti tynrai, khamtam lyngba ka jingïathuhkhana kaba pynpyrkhat, ka jingïadei kaba jylliew bad ka pateng jong ka jaidbynriew Khasi.
Ki jingpynkylla ktien jong ka kiba la ïoh jingïaroh kum ka ‘The Teachings of Elders’ bad ‘The Main Ceremonies of the Khasis’ ki la pynneh-pynsah ïa ki riti-dustur ba riewspah lyngba ka ktien, katba ki jingthoh ‘fiction’ kum ka ‘Shadow Men’ bad ka ‘Hill Songs of Love and Longing’ ki pyni shaphang ka jingim ha ki Lum Khasi.
Ha ka sngi jong ka jingïalang pynkup burom, yn ïadonlang ki nongshah khot sngewbha kum u R. Venkataramani, Attorney General ba donburom ka India bad Justice Sanjay Kishan Kaul, nongbishar barim ka Supreme Court ka India, kum ki Kongsan.
Ka Dr. Rennie Joyy, nongseng ka Aalekh Foundation haba ai jingkren shuwa ka jingïalang, ka la ong, “Ka kam jong ka Bijoya Sawian ka dei ka jingwanrah jingkylla ba jar-jar ha ka thoh ka tar – kaba pynneh ïa ka burom, ka sur, bad ka jingïohi ïa ki khana kiba barabor ym ju da kham ïohsngew. Ha Aalekh, ngi sngew sarong ban ai burom ïa ki kynthei kum ma ka kiba pynwandur ïa ki jingïathuhkhana, pynroi ïa ki pateng, bad pynkynmaw ïa ngi ïa ka bor jong ki kyntien ban pynneh-pynsah bad pynkylla.”
Ka ‘Aalekh Foundation Women Achievers’ Awards’ ka dei ka sienjam kaba kongsan kaba pyndonburom ïa ki kynthei kiba la kynjoh sha ka thong ha la ki jong ki jong ki kam ba ki trei bad kiba noh synñiang ruh sha ka imlang-sahlang, ka lariti, bad ka jingtei ïa ka ri.
