Shillong, Naitung 13
Ka long shisha ka khubor kaba sngewsih ban tip ba kiba bun ki samla haba ki ïakynduh jingeh haba ki la poi shabar ka jylla hynrei ynda ki la ïoh jingïarap bad poi pat sha la shnong ha Meghalaya kim ju sngewnguh shuh ïa kiba la ïarap.
Kane ka la jia ïa kiba bun ki samla jong ka jylla kiba la mad shibun ki jingeh haba ki leit bylla shabar ka jylla haba ki la pan jingïarap na u Bah Marvel Sungoh uba trei ha My Home India kaba don ha Delhi hynrei kine ki briew ynda ki la poi sha shnong kim ju kynmaw shuh ïa u bad kim shim shuh lada u phone ma u.
U Bah Marvel Sungoh uba don mynta ha nongbah Delhi u dei uba trei bad ka My Home India naduh u snem 2014 uba la ïoh ban ïarap shibun ki samla na Meghalaya kiba shah thok bad ïakynduh jingeh haba ki leit trei ha kylleng ki jylla ka ri India.
Ka jingpaw pyrthei ïa ki jingïarap u Bah Marvel Sungoh ka dei haba u nonglum khubor U Nongsaiñ Hima u la ïakynduh ha ka por ba leit lum khubor sha Delhi ha u Naitung 2024 haba ka Sorkar Meghalaya ka pynlong ïa ka jingpyninam ïa u sohtrun.
U Bah Marvel Sungoh u dei shnong trai na Byrwai, Khliehriat kaba hap ha East Jaiñtia Hills District.
Haba ïakren bad u Bah Marvel Sungoh u la ïathuh ba ha kine ki snem ki la don bun ngut ki samla kiba u la dep ïarap hynrei ym don ba tip namar u khlem ïoh pynmih khubor hynrei ha kine ki shisnem ki paidbah ki la ïoh jingtip naduh ba u la ïakynduh ïa u nongthoh khubor ha Delhi.
Ha kawei pat ka liang u la pynpaw ïa ka jingsngewsih namar bun ki samla kiba u la dep ïarap ynda ki la poi sha shnong kim kynmaw shuh ïa u namar kim ju phone shuh ban ai khublei ïa u bad lada u phone ïa ki, kim ju shim ïa ka phone.
U la ong ba lada u ai khubor um ju pyntip ïa ki kyrteng briew, kyrteng shnong hynrei ka jingtip ka sah beit tang ha u bad kiba mad jingeh.
Shuh shuh u la ïathuh haba u la ïarap u kwah ba kine ki briew kin ai khublei da kaba phah da ka video namar ma u ruh u donkam ban phah ïa ki jingpynshisha sha ophis My Home India khnang ba kin ngeit ïa u.
U Bah Marvel u la ong haba ka My Home India ka ïarap kam ju shim pisa hynrei ka ïarap da ka buit bad ka bor ban leit shaw na jaka ba ki ïakynduh jingeh.
“Nga sngewlyngngoh shisha haba ki ïakynduh jingeh ki phone ban pan jingïarap wat haduh 12:00 baje shiteng miet ki dang kyrpad ka jingsngewsynei hynrei ynda ki la poi sha shnong kim ju phone shuh ïa u,” u la ong.
U la ong biang kito kiba la mad jingeh ynda ki la ïoh jingïarap, kito ki la sngew ba ka la biang ïa ki hynrei ki dei ban ai khubor khnang ban long jinghikai ïa kiwei pat namar ki dang bun na Meghalaya kiba trei shabar ka jylla.
Na ka liang u Bah Marvel un ym kynrandien wat la bun kiba khlemakor hynrei lada don ki paidbah ka jylla kiba ïakynduh jingeh u kloi ban ïarap da kaba kin phone ha une u number jong u 7002802561.
