Shillong, Naitung 14
Ka ding kaba klang katta-katta ka la pynkylla dpei ïa ka ïing sah jong u Chowkidar ka Raid Laban Secondary School kaba don ha ka shnong Madan Laban Shillong.
Kane ka jingjia, ka la jia ha ka Sngi U Blei ha ka por kumba 1:30 mynsngi. Da ka jingwan poi biang por jong ki pulit ka tnat Fire and Emergency Services la lah ban pynlip noh ïa ka ding, shwa ba kan pur sha ka skul kaba don markhap, hynrei baroh ki jingdon jingem hapoh ka ïing ki la ingkhong lut khait.
Ka Kong T Lyngdoh Nongpiur, kurim jong u Bah Khrawbor M Mawñiuh ha ka jingïakren bad u nongthoh khubor ka la ong, “Ka ïing ka la sdang kem ding ha ka por kumba 1:30 eiei katba ma ka bad u kpa ki dang thmu ban leit sha ïing ïap briew. Hynrei tang shu poi ha Polo, la hap ban wan phai noh mar-mar hadien ba la ïoh jingtip halor kane ka jingjia.”
Haba kylli, ka la ong, “Ki don tang ki khun ha ïing, ar ngut ki khun shynrang ki don shabar katba hapoh ïing i don tang i khun kynthei bad iwei i khun paramarjan.”
“Nga ainguh ïa U Blei ba kam shym la jia kano-kano ka jingjia ba sngewsih ïa ki khun. U Blei hi u tip kham bha,” la ong ka Kong Nongpiur.
“Katkum ka jingïathuh jong ki khun, nyngkong shwa ki la ïohi ïa ka tdem bad ka jingsma ingkhong jong ki waïar ilektrik. Mar kumta hi ki la ïoh sei tang ïa u Cylinder shabar hynrei baroh ki jingdon jingem hapoh ka ïing ki la ingkhong lut ploiñ,” la ïathuh shuh shuh ka Kong Nongpiur.
Ka la ïathuh ba ïa mynta ki bor pynïaid jong ka skul ki la ai jaka sah shipor hapoh kawei ka kamra jong ka skul.
