London, Naitung:
Ki kynhun iarap ki la leit ban mareh mar-mar ha ka Sngi U Blei sha ka jaka ba ka liengsuiñ rit ka la hap ha ka Kad Liengsuiñ jong ka London Southend.
Ha ka jingpynbna ha ki social media, ka Kad Liengsuiñ ka la pyntikna ïa katei ka jingjia kaba shyrkhei kaba la jia ha katei ka sngi.
Katkum ki dur ba la saphriang ha ki rynsan Social Media, la iohi ia ka ding kaba klang shalor suiñ bad ka tdem kaba rben bad iong kaba mih na katei ka jaka ba la bthei katei ka liengsuiñ. La iathuh ba katei ka liengsuin, ka don ia ka jingjrong kaba 12 meter (39 phut).
U nongsakhi John Johnson, uba don ha katei ka Kad Liengsuiñ ha ryngkat bad ka ïing ka sem jong u, u la ong ba u la ïohi ïa ka ding kaba heh bha hadien ba ka liengsuiñ ka la hap bad thung da ka khlieh sha khyndew.
U Johnson, u la iathuh ba ki bor pynlip ding jong ka Kad Lieng-suiñ, ki la shimkhia khlem da pynslem tang mar ia iohi ia katei ka jingjia, ha kaba, ki la phah ia ar tylli ki kali pynlip ding sha katei ka jaka ba hap katei ka liengsuiñ bad nangta la wan poi sha ki jong ka thaiñ ha ryngkat bad ki kali kit nongpang.
Ki pulit jong ka Essex ki la iathuh ba la pyntip ia ki tang shwa ka por 4 p.m. ka por jong ka thaiñ sha ka “jingjia kaba shyrkhei” ha ka kad liengsuiñ kaba rit bha, kaba don kumba 72 kilomitar shaphang mihngi jong ka nongbah.
Ym shym la pynpaw bniah mardor shano katei ka liengsuiñ ka leit ne katno ngut ki briew kiba don ha katei ka liengsuiñ. Kum ka jing-ïada namar ka jingjan jong ki bad katei ka jaka, ki pulit ki la pynkynriah noh ïa kawei ka klob golf bad klob rugby kaba don ha katei ka thaiñ.
U nongmihkhmat jong katei ka thaiñ, u David Burton-Sampson, u la kyntu ia ki paidbah nongshong shnong ba kin ia jngai bad ai ba ki bor ba kyrkieh kin leh ia la ka jong ka kam ram katba ki dang peit-thuh ia ka jinglong jingman ha katei ka jaka bad u la phah ruh ia ka kyrwoh sngewlem sha ki bahaiing-hasem jong kitei kiba la ngat ha katei ka jingjia baroh.
