Khliehriat, Naitung 14
Ka lympung ïalehkai 3rd Division League Stage ba la pynïaid da ka East Jaiñtia Hills District Football Association (EJHDFA) ka la poi sha kaba kut ha ka Lah Sngi U Blei.
Ki kynhun kiba la rung sha ka pre-quarter final na ka Pool-A ki long ka Narwan SC, Pool-B ka Youngstar SSC Huroi, Pool-C ka Tongseng YSC, Pool-D ka Tuber Shohshrieh SC, Pool-E ka Moolang SC, Pool-F ka Suchen Lumiarain SC bad Pool-G ka Umrasiang United SC.
Ha ka Pool-H ka Rymbai Pohskur SC, Pool-I ka Moonongtdu SC, Pool-J ka Musniang Rim SC, Pool-K ka Musning Youth SC, Pool-L ka Wahsanphaw SC Sohkymphor, Pool-M ka Rymbai SYWO, Pool-N ka Lumshyrmit SCSC, Pool-O ka Lama Youth SC, katba ka Cham Cham SC bad Nongthymme SC ki dei ki kynhun kiba la lah ban pynpaw ka jingtbit ryngkat ki kyndon.
Haba phai sha ka jingïalehkai kaba khatduh jong ka League kaba la long ha madan Artificial Turf Diengshynrum, Khliehriat hynne ka sngi, ka Lama Youth SC ka la pynliem noh ïa ka Borghat SCSC lyngba ka shi kol ba la thep da u Poimi Suiam ha ka minit kaba 65.
Katba ka jingïalehkai kaba bud hapdeng ka Nongthymme SC bad ka Cham Cham SC ki la ïasam mar shi point hadien ba ki la ïakhaid mar 1-1 kol. Ïa ka kol jong ka Cham Cham la thep da u Raymon Phawa ha ka minit kaba 42, katba ïa ka kol jong ka Nongthymmai la thep da u Mewanjop Muksor (54).
Ka jingïalehkai pre-quarter final kan sdang ha ka 18 tarik mynta u bnai hapdeng ka Youngstar SSC Huroi pyrshah ïa ka Tuber Shohshrieh ha ka por 12:15 baje mynsngi, katba ka Narwan SC ïa ka Tongseng YSC ha ka por 3 baje nohphai sngi.
