Nongstoiñ, Naitung 14
Ka West Khasi Hills Blood Donors Organisation (WKHBDO) kaba dei ka tnat jong ka Aijingim VBDO Shillong hapoh ka jinglam lynti u Bah Lumlang Kharsyiemlieh, President bad ka Kong Medaris Lyngdoh, General Secretary ha ka Lah Sngi U Blei jong ka taïew ka la pynlong ïa ka jingnoh synñiang ïa ka snam kum ka jingsdang ban treikam ha Civil Hospital Nongstoiñ. Ha katei ka sngi, ha shuwa ban sdang ka jingai snam la pynlong ïa ka jingïalang ba lyngkot ïa kaba la pynïaid da u Bah Lumlang Kharsyiemlieh.
U Dr. Eric Wanniang kum kongsan haba ai jingkren ha katei ka sngi, u la ong ka Civil Hospital Nongstoiñ lyngba ka Blood Bank ka la ïoh ban ai ka jingshakri ïa kumba 500 ngut tam ki mynsiem briew kiba donkam eh ïa ka snam ban ïarap.
“Ka long kaba donkam eh ban ai snam ban ïarap namar kam ktah ïa ka jingkoit jingkhiah bad u la ong ka thong ka Blood Bank ha Nongstoiñ ka long ban ïarap ïa baroh kiba donkam snam khlem da pan shuh na ki bahaïing lada donkam snam,” u la ong.
U Bah Lumlang Kharsyiemlieh, President ka Organisation, u la ong baroh shi katta ngi ïasnoh kti lang bad ka Aijingim VBDO Shillong hynrei mynta lyngba u Ma Andreas Marweiñ kum Nongïalam la pynkha tnad noh ban ïeng ha la ki jong ki kjat kata ka West Khasi Hills Blood Donors Organisation.
“Ka thong jong ngi ka seng ka long ban hikai ban ïarap lang ban kyrshan ïa ki paradoh parasnam, da ngin ai snam sngewbha ïa ki namar ngim don ka pisa kum ka Organisation ban ïarap bad ngin pyrshang ban ïarap da ka snam,” ong u Bah Lumlang.
Shuh-shuh ha kane ka sngi la ïoh ban ai snam ruh da ki phew ngut kiba la wan ban ïarap ai snam, ki dkhot ka West Khasi Hills Blood Donors Organisation la ïoh ruh ban ai ïa ki syrnod bad jingai sngewbha da ka Blood Bank ryngkat ka organisation sha kiba wan ai snam.
