Guwahati, Naitung 14
Ki pulit jong ka Assam ha ka Lah Sngi U Blei ki la ïoh ban kurup haduh 50,000 tylli ki dawai kuli Yaba tablets na kawei ka bos kamai ha South Salmara Mankachar district jong ka Assam.
Ha kaba ïadei bad kane ka jingjia la kem noh ïa uwei u briew ba la tip kyrteng kum u Ashique Babu, 26 snem. La ong ba une u briew u la kit ïa une u jingdih pynbuaid ha kawei ka bos Night Super (AS01-TC-0375) kaba mih na Inter-State Bus Terminus (ISBT) ha Guwahati ban leit sha Mankachar.
Ka tyllong khubor ki pulit ka la ong ba ïa une u drok la wan pynpoi tuh sha India na Myanmar lyngba ka Manipur, bad ha kaba la pyndonkam ïa ka Assam kum ka lynti ïaid. Une u drok dei uba la thmu ban pynpoi sha Mankachar, ka jaka kaba dei kawei na ki jaka shalan tuh ha khappud ka India bad Bangladesh.
La ong ba na ka liang jong ki pulit hadien ba la ïoh ïa ka jingtip kaba bniah, ki la pynlong ka jingtalasi kali ha Sonapur, ha kaba la ïoh ban bat noh ïa katei ka bos. Ïa utei u dawai kuli la lap na kawei ka pla kieng shadien, ïa uba la thep bad song bha ha ki plastik ïong, uba don ka jingkhia haduh 5,894 gram.
Katkum ka jingpyntip na ka liang jong ki bor ba dei khmih, la ong ba ka dor ïew jong une u mar ba la ïoh kurup ka long haduh kumba T.2.5 klur.
Katkum ki jingtohkit sdang ba la pynlong, la sngewthuh ba ïa une u mar ba la wanrah na Manipur, la pynïaid lynti lyngba ka Guwahati, bad ba la aiti pat sha utei u briew ha ISBT.
La suba jur ba kine ki dawai kuli la thmu ban leit sam ha ki thaiñ khappud jong ka Mankachar, ha ki bynta jong ka Meghalaya, bad ruh ban shalan tuh sha Bangladesh.
Halor kane, la dep ban mudui da ka ejahar (FIR) hapoh ka Narcotic Drugs and Psychotropic Substances (NDPS) Act ha thanat Mankachar. Ka jingtohkit ba kham bniah halor kane ka dang ïaid shakhmat.
