Shillong, Naitung 14
Ka North East NSS Youth Festival 2025, ba la pynlong da ka Union Christian College (UCC), Umïam Khwan, ka la poi noh sha kaba kut hadien san sngi jong ka jingrakhe.
Ha kane ka jingrakhe ka la don ka jingïasam ïa ki kolshor halor ka phangpdeng “Kawei ka thaiñ shatei lammihngi, kawei ka mynsiem” ne “One North East, One Spirit”.
Ïa kane ka jingrakhe la plie paidbah ha ka 8 tarik Naitung, 2025, ha Christopher Singh Auditorium. Ha kane ka sngi ba la pynlong ïa kane ka jingrakhe, la ïoh ïa ki jingkren na ki riew pawkhmat, kiba kynthup ïa u Rakkam A Sangma, Myntri ka tnat Pule Puthi jong ka Sorkar Meghalaya; u Bah F Rumnong uba dei u Nodal ophisar ka NSS ka Jylla; u NC Deori uba dei u NSS State Nodal Officer; Dr. RM Manih uba long u Principal jong ka Union Christian College; bad u Bah Jonathan Shylla uba dei u Additional Deputy Commissioner ka Ri Bhoi District.
La plie ïa ka jingïalang da ka jingduwai, ka jingrwai NSS, bad ki jingshad kolshor, kiba pynpaw ïa ka mynsiem shakri lang bad ka jingsarong jong ka thaiñ.
Kane ka janmiet ka la pynsngewtynnad da ka Cultural Programme, ha kaba ki samla pule na kylleng ka thaiñ ki la pyni ïa la ka jong ka pateng lyngba ka put ka tem bad ka shad.
Ki jingshad ba pawnam ki kynthup ïa ka jingrwai beatboxing da u Himraj Borah (Assam), ki jingshad marwei bad ki jingshad tynrai na Assam bad Meghalaya, bad ka jingrwai hip-hop kaba donbor bha na Nagaland, kaba la khring ïa ki jingkyrhuh na ka ïing peitkai kaba la dap da ki paidbah.
U Bah F Rumnong u la ai jingkren da kaba pynksan ïa ka jingpher jong ka kolshor, ki SDG, bad ka jinglong ba neh jong ka jingshakri ïa ka imlang sahlang. Ha kane ka sngi la pyni ïa ki jingshad Khasi kum ka shad mastieh bad ka shad pliang, bad ka jingrwai sur flute solo da u Bah Pynhunlang suphai.
La sam ïa ki syrnod da u Bah ABS Kharkongor, Ophisar Programme jong ka NSS, UCC, sha ki Programme Ophisar na Assam, Nagaland, Tripura, Sikkim, Mizoram bad bun tylli ki kolej jong ka Meghalaya. Ka kynhun jong ka Assam NSS ka la pynkhlaiñ ïa ka jingïalang da ka jingsawa Power Clap jong ka NSS, bad ïa ka jingïalang la pynkut da ka Jingrwai Khublei bad ka jingrwai Ri.
Ka tamasa kaba san sngi ka la long kum ka rynsan ban ïasam jingtip, ban pynpaw ïa ka kolshor, ban pynkupbor ïa ka met, bad ka jingïatylli ha ka thaiñ. Katba ki nongtrei mon sngewbha ki dang wanphai biang sha la ki jong ki jong ki jylla, ki la rah shakhmat ïa ki jinglong jong ka NSS-ka jingshakri, ka jingpynbeit ryntih, bad ka jingïatylli jong ka ri-da ka jingaiti kaba thymmai ha kaba tei ïa ka imlang sahlang bad ka jingïatreilang bad ki samla.
