Shillong, Naitung 14
Ki Nongïalam jong ka Federation of Khasi Jaiñtia and Garo People (FKJGP) Upper Shillong Circle hapoh ka jingïalam u Samla Hopewell Khar-kongor Asst. General Secretary ha ka jingïa-don ryngkat u Samla Bantei Nongkhlaw, President FKJGP Bañiun Unit, Samla Donkupar Nongdhar, President FKJGP Pomlum Unit ha ka Lah Sngi U Blei ki la leit ban khang khyrdep bad pynher krad lut ïa baroh ki nongtrei jong ka Ïing Dak kaba don ha Hynñiew Mer, Upper Shillong namar ka jingbym kheiñ snep bad ka jingbym burom shuh ïa ka sngi Behdeiñkhlam kaba dei ka jinglehniam jong ka jaidbynriew.
Ha kawei pat ka bynta ka FKJGP Shillong City hapoh ka jingïalam jong u Samla Arkinfield Khonglam, President FKJGP Shillong City ka la leit ban khang khyrdep noh ïa ka General Post Office (GPO) kaba don ha ka Nongbah Shillong. Na ka liang ki Nongïalam jong ka FKJGP Upper Shillong Circle bad kumjuh ruh ki Nongïalam jong ka FKJGP Shillong City ki la pynpaw ka jingbynñiaw halor katei ka bynta. Ha kajuh ka por na ka liang jong ka seng ka la phah ruh ïa ka kyrwoh sha ki bor jong ka Sorkar Jylla bad Sorkar Pdeng ba ki dei ban pynmih da ka hukum sha baroh ki shnat treikam ba ki dei ban burom ïa kino-kino ki sngi kyrpang bad ki sngi khraw jong ka jaidbynriew.
Ha kajuh ka por ka FKJGP ka la buh ruh ïa ka jingmaham ba kin sa leh da kaba tyngeh ïa kino-kino ki bym burom ïa ka Lyngkhuh Sngi Ïap jong u Khlawait jong ka jaidbynriew, u Tirot Sing ka ban sa rakhe ha ka 17 tarik mynta u bnai.
Ha kwei pat ka khubor, ka Hynñiewtrep Youths’ Council (HYC) Nongthymmai Circle hapoh ka jingïalam u samla Daniel Syiem kum President, ha ka Lah Sngi U Blei ka 14 tarik u Naitung 2025, ka la leit ban khang tala ïa kawei ka ophis treikam jong ka Jio kompani kaba don ha Fire Brigade.
Kane ka jingleit khang tala ka seng ïa katei ka ophis treikam jong ka Jio kompani ka dei halor ka nongrim jong ka jingbym burom katei ka ophis ïa ka jinglehniam Behdeiñkhlam kaba la long mynta ka Lah Sngi U Blei.
Ka seng ka lap ruh ba tang kane kawei ka ophis treikam kaba plie mynta ka sngi bad ruh man ka por ka ju plie beit bad kam ju burom ïa ka sngi kyrpang jong ka bri u hynñiewtrep. Haba ïakren bad u samla Daniel Syiem, u la ong ba kane ka ophis man ka por ka ju plie beit haba don ki sngi kyrpang jong ka jaitbynriew jong ngi bad mynta ruh ka sngi kyrpang jong ka Behdeiñkhlam kane ka ophis ka plie beit.
Nalor kane, u la ong ba ka seng ka la ïoh ban ïakren bad ki briew kiba trei ha katei ka ophis bad ka jingbymdon ki trai jong katei ka ophis, ka seng ka la khang tala shisyndon khnang ba kin ym mlien shuh nangne shakhmat.
Namar kata, ka seng ka la buh ruh ïa ka jingmaham da kaba tyngeh ïa katei ka ophis kaba man la ka por ka ju plie haba ïa dei bad ka sngi kyrpang u paid ka Bri u Hynñiewtrep, la ong u Bah Daniel.
