Shillong, Naitung 14
Ka Laitlulong SC bad ka Lapalang SC ki la jam sha ka quarter final ha ka 4th Division (U-20) Football League 2025 ba la pynïaid da ka Shillong Sports Association (SSA) hadien ba ki la ïoh jingjop ha ka Lah Sngi U Blei.
Ha kane ka jingïakhun pre-quarter final kaba la long ha ka Lah Sngi U Blei ha SSA Stadium kaba ha First Ground Polo, kine ki kynhun ki la lah ban ïalehkai bha naduh kaba sdang. Ka Laitlulong ka la ïoh ban pynkhih jar nyngkong eh lyngba u Wallamjingsuk Dkhar ha ka minit kaba 28. Kane ka kynhun ka la thep biang sa shi kol ha ka kylla miet lyngba u Damewan Rani ha ka minit kaba 60.
Haba phai sha kawei pat ka jingïakhun pre-quarter ba ar, ka Lapalang SC ka la jop da 3-1 kol ïa ka Them Rangshken. Ka Lapalang ka la ïoh ban pynkhih jar nyngkong eh lyngba u Stevenson Sungoh ha ka minit kaba 38 bad u Emineki Pohthmi (49) na ka bynta ban tam ar kol.
Hapdeng kane ka jingïakhun, ka Them Rangshken ka la lah ban pynphai kylla shi kol lyngba u Wellborn Khyriem ha ka minit ba 68 ha shwa ba u Superlative Khongngaiñ (80) un pynphai kylla na ka bynta ban pynlong ïa ka Lapalang ban jop shi syndon.
