Jowai, Naitung 14
Hapdeng ka jinglehkmen Behdeiñkhlam, ka kali kaba synran (Escort) ïa ka Myntri ka Kong Ampareen Lyngdoh ka la shah pynjulor ha ka por ba rah ïa u rot sha pung Aitnar.
Ïa kane ka kali la pynïeng ha surok ka Dorbar Shnong Chiliang-raij, Jowai.
La ong ba na ka liang jong katto-katne kiba la sakhi, ki la kynnoh ba la don uwei u briew uba la kiew halor katei ka kali synran jong ka Myntri bad ban pynjulor ïa ka ïit kaba shakhmat (windshield) bad u la pyrshang ruh ban jrong kti ïa ki pulit pahara.
Shuh shuh la ïathuh ba kane ka la jia ha ka por ba ka kynhun na Umshangiar ka wanrah ïa u rot ban pynhiar sha Aitnar.
Haba ïadei bad kane ka jingjia, ki pulit ki la kem noh ïa uwei u briew halor ka jingkynnoh ba u thmu jrong kti ïa ki pulit pahara kiba don ha katei ka kali.
