Ka jingim jong ngi ki briew ka shong ha ki ksang-kti ba donbor jong u Nongthaw Nongpynlong ia kiei kiei hapoh khrum ka bneng. Namar ym don ba lah ban pynlyngkot lane pynjrong ia ka rta.
Dei tang ka bor jong u Blei nongthaw nongpynlong ïa ngi ki briew bad ïa kiei kiei kiba don hangne ha sla pyrthei. Ngi lah ban ïaroh ban duwai bad pynlong ki jing-leh niam ne ki jingïaseng bapher bapher hangne ha sla pyrthei, hynrei ngim lah ban pyntam lane pynduna ïa la ka rta. U Ioannis u la ïathuh bad u la ong, u briew um lah ban ioh diang ei ei ruh em lymda la ai ha u na bneng (Ioannis 3 : 27).
Ka jingim jong ngi ki briew ka shong ha ka jingleh isynei jong u Blei. U Blei u la bynta ïa ngi iwei pa iwei ba ngin im tip briew tip Blei ym ba ngin im lyng-kar ha kane ka pyrthei. Namar ka jingim ka kham kor ïa ka jingbam bad ka met ïa ka jaiñkup (Loukas 12 : 23). Kumta ka kam ïalap niam ruh ka long ka kam kamai pisa ban ïoh spah ym ban ïoh ïa ka jingsuk khlem ka mon u Blei.
Ka ktien u Blei ka ong, phim lah ban dih na ka khuri U Trai bad na ka khuri ki ksuid, phim lah ban ïoh bynta na ka miej U Trai bad na ka miej ki ksuid (I – Korinth 10 : 21). Ngi ki briew ngim don bor ei ei watla ngi don ha ki niam bapher bapher ruh. Namar dei tang u Blei uba lah ban ai ka jingsuk ïa ngi ki briew katba dang im ei ha kane ka sla pyrthei.
C. B. Iawphniaw
