Shillong, Naitung 15
Ka ïingbishar Special Judge (POCSO) ka East Khasi Hills ka Kong MK Lyngdoh, ka la hukum ban set patok haduh 20 snem ïa ki 3 ngut runar kiba leh be-ijot ïa ka khynnah katkum ka mukotduma ba la pynrung hapoh ka thanat Sadar.
Kine lai ngut ki runar ki kyrteng u Ashit Chanda, u Raj Roy bad u Prasenjit Das, kiba la shah pynngat hapoh ka kyndon 5(i)/6/11(v)/12/17 POCSO Act pule lang bad ka kyndon 506 IPC.
Ïa kane la pyntip da u Superintendent of Police ka East Khasi Hills, Bah Vivek Syiem.
Ka ïingbishar ha ka hukum ba la pynmih ha ka 10 tarik u Naitung, ka la hukum ban set patok 20 snem lem bad ka kuna T. 50,000 ïa kine lai ngut halor ki kam runar ba la pynngat hapoh ka kyndon 6 jong ka POCSO Act bad lada kim lah siew ïa ka kuna, kin hap shong patok sa hynriew bnai.
Ka ïingbishar ka la hukum ruh ban set ïa ki haduh 2 snem bad ka kuna T. 10,000 halor ki kam runar katkum ka kyndon 12 ka POCSO Act bad lada kim lah siew ïa ka kuna, kin hap shong patok sa 3 bnai.
Hapoh ka kyndon 17 jong ka POCSO Act, ka ïingbishar ka la hukum ban set ïa ki 10 snem bad ka kuna T. 20,000 bad lada ym lah siew kin hap shong patok sa 3 bnai.
Hapoh ka kyndon 506 IPC, kine ki runar ki la ngat ban shong patok 2 snem bad ka kuna T. 10,000 bad lada kim lah siew, kin hap shong patok sa 3 bnai.
Ïa kane ka kam bymman la tohkit da ka WPSI MM Momin kaba don mynta ha Resubelpara, North Garo Hills.
