Shillong, Naitung 15
Ka ïingbishar Meghalaya High Court ha ka Sngi Ba-ar, ka la bthah ïa ka Ministry of Defence, ka Sorkar Jylla, ka Airport Authority of India (AAI) bad ïa u Director General jong ka Civil Aviation ba kin shim ki lad ki lynti ban pynsted noh ïa ka kam kaba ïadei bad ka projek ban pynheh ïa ka kad liengsuiñ Shillong Airport.
Kane ka jingbthah ka la wan hadien ka jingshong bishar ïa ka kaiphod ba la aiti da ka Airport Authority of India.
Ha ka hukum ba la pynmih hadien ba la shong bishar ïa ka PIL halor kane ka kam, ka Division Bench ba kynthup ïa u Chief Justice IP Mukerji bad Justice W Diengdoh ka la ong “Haba bishar ïa kane ka kaiphod, ngi shem ba haduh mynta dang dep leh tang ki kam barit baria kiba donkam ban leh ha ka ban pynheh bad shna bha ïa ka Shillong Airport. Naduh mynta, donkam ban leh kham bun ki kam ha ka lynti kaba sted ban lah pyntreikam noh ïa kane ka projek ha ki sngi ban wan”.
“Kumta, dei ban shim noh ki lad ki lynti ban pynsted noh ïa ka kam da ki bor ba dei khmih kaba kynthup ïa ka Ministry of Defence, ka Sorkar Jylla, ka AAI bad u Director General ka Civil Aviation,” ka la bthah.
Ka ïingbishar ka la bthah ruh ban suh lang ha ka affidavit ïa ka jingthoh ba la pynkhreh da ka Sorkar Jylla halor ka projek, kaba hap ban smai da u ophisar jong ka Jylla bad ban aiti sha ka ïingbishar hapoh ka 18 tarik Naitung.
Haba bishar ïa kane ka jingthoh, ka ïingbishar ka shem ba donkam haduh 22 akar ka jaka na ka bynta ka projek ha kaba 10.30 akar ka dei kaba hap shim na ki bor shipai. Ka Sorkar Jylla ka la mynjur ban thied ïa 11.75 akar ka jaka ha ka dor ba T.72,17,56,237 da kaba ïasoi ïa ki soskular ïadie ïathied bad ki trai jaka. Ïa ki jaka la khmih lynti ban thied hapoh u Naitung mynta u snem. Ka Ministry of Defence ka la ai jingbit ïa ka Jylla ba kan pyndonkam ïa ka 10.30 akar ka jaka shipai ha Umroi Military Station, Shillong halor ka soskular bad ka Sorkar ba kan ai bujli ïa ka jaka ba shongdor kumjuh sha ka Ministry.
Katkum ka draft master plan, ka jingpynheh ïa ka runway 4 (RWY 4) kan long da 571 meter ka ban long baroh lang haduh 2400 meter. Da ka jingpyndep ïa kane ka RWY 4, ka jingwan hiar ki liengsuiñ kan long na ka runway 22 (RWY 22) bad kin her pat na ka RWY 4.
Ha ka por jong ka jingbishar, u Deputy Solicitor General of India u Dr Mozika u la aiti ba ïa ka ‘tender’ ban pynïaid shakhmat ïa ka jingtei, jingpynthymmai bad jingpynkylla ïa ki jingtei jong ka kad liengsuiñ yn sa rai da ka Airports Authority of India sha u kontraktor mardor mar ïa ïoh ïa ka jaka na ka Sorkar Jylla bad na ki bor Shipai bad ruh ynda la ïoh ïa ka jingmynjur halor ka mariang.
Ka ïingbishar ka la buh ban shong bishar biang ïa kane ka kam ha ka 12 tarik u Nailar, 2025.
