Shillong, Naitung 15
U Bah A.L Hek uba dei u nongïalam ka Bharatiya Janata Party (BJP) bad ruh u Myntri ka Sorkar Jylla u la ong ba ka seng kan sa shim ïa ka rai ha kaba ïadei bad ka kam shuki Myntri.
Haba kylli la ka BJP kan ïoh ar tylli ki shuki Myntri ha ka Sorkar MDA, u Bah Hek u la buh sha ka seng bad ong ba kin bud beit thik ïa kano-kano ka rai jong ka seng. “Phi lah ban kylli na ka seng. Ka seng kan sa shim ïa ka rai halor ki kam jong ka seng ym jong u Bah A.L Hek,” la ong u Bah Hek haba ïakren bad ki lad pathai khubor ha ka Sngi Ba-ar.
Lada ka dei ban long kumta, u Bah Hek u la ong, “Kane ka dei kaba phi hap ban kylli na ka seng. Ka seng kan sa batai ïa phi.”
Kane ka jingpynpaw jong u Bah Hek, ka la wan hadien ba la saphriang ka khubor ba u lah ban shah pynhiar shuki na ka bynta ban ailad ïa uwei u MLA ka BJP na South Shillong u Bah Sanbor Shullai ban shimti bujli kum u Myntri na ka bynta ar snem shiteng kiba dang sah hapoh ka Sorkar Meghalaya Democratic Alliance (MDA-II) ba la ïalam da ka NPP.
