Shillong, Naitung 15
Ka lympung ïalehkai SRGT 3rd Division Football League 2025 ba la pynïaid da ka Shillong Sports Association (SSA) ka la nangjam shaphrang ha kaba ka Madanryting SC bad ka Pomlakrai SC ki la ïasam mar shi point hadien ba ki la ïakhaid mar 1-1 kol ha ka Sngi Ba-ar.
Ha kane ka jingïakhun kaba la long ha SSA Stadium kaba ha First Ground Polo, baroh ar kynhun ki la pyrshang ban ïakhun tyngeh naduh kaba sdang ha kaba kim shym la lah ban pynkhih jar haduh kaba kut jong ka kylla step.
Dei ha ka kylla miet ba ka Madanryting ka la ïoh ban pynkhih jar nyngkong eh lyngba u Nick Mawsor ha ka minit kaba 58. Ka jingïakhun tyngeh ki rangïalehkai ka la wan urlong ïa ka Pomlakrai na ka bynta ban pynphai ha shwa ban wai lyngba u Dabor Maïan Kharkongor ha ka minit kaba 90+3.
