Beijing, Naitung:
U Myntri kam bar ri ka India, u S.Jaishankar u la pynlong ïa ka jingïakren arliang mamla bad u paralok jong u na China u Wang Yi ha ka Lah Sngi U Blei ha ka nongbah Beijing jong ka China, katba baroh ar tylli ki ri marjan ki dang ialeh ban thaw lad ban pynbha biang ïa ka jingïadei hapdeng jong kine ki ri. U nongïalam ka India u don ha ka nongbah China ha ka jingleit jngoh kaba lai sngi ban ïashim bynta ha ka jingïalang jong ki Myntri bar ri jong ka Shanghai Cooperation Organisation (SCO) ha ka 14 bad 15 tarik mynta u bnai.
Ka jingiakren jong u Jaishankar bad u paralok jong u na China ka long ban kyntiew ia ka jingiadei hadien ka jingiakynad kaba la neh saw snem ha ka Line of Actual Control (LAC). Kumta, la ong ba kine ki arliang mamla ki la poi sha ka jingiasngewthuh jingmut ban pynkut noh ia ka jingiakynad ha u bnai Risaw ba la dep. Naduh katei ka por, ki nongialam jong ka India bad China ki la iakynduh ia ki jingeh jong ki jingjia ba bun jait na ka por- sha ka por.
U la kdew ba baroh ar tylli ki jaitbynriew ki la kiew bha ha kine ki hynniew bnai ba la dep ha kaba pynbeit ryntih ïa ka jingïadei jong ngi arliang mamla.
“Ka dei ka jingmih na ka jingpynbeit ïa ki jingïakynad ha khappud bad ka jinglah jong ngi ban pynneh ïa ka jingsuk bad jingkmen hangta. Kane ka dei ka nongrim ba kongsan na ka bynta ka jingshaniah ha ka buit treikam markylliang bad na ka bynta ka jingïaid beit ïaid ryntih jong ka jingïadei hapdeng ki arliang mamla. Mynta ka dei ka kamram jong ngi ban weng ïa kiwei pat ki bynta kiba ïadei bad khappud, kynthup ïa ka jingpynjem ïa ka jingïakynad,” ong u Jaishankar.
Kum ki ri ba marjan bad ki ri kiba heh ha ka pyrthei mynta, ka India bad ka China ki don ki bynta bad ki jingthew bapher bapher ha ka jingiadei jong ki. U Jaishankar u la ai jingmut ba ki lad ki lynti ban pynlong thikna ïa ki jingïakren hapdeng ki briew bad ki briew ki lah ban pynroi ïa ka jingïatreilang kaba myntoi lang.
U Jaishankar u la kdew ruh ba ki kam lehnoh, ka jingpyniakhlad bad ka jingleh palat pud ki dei ki jingeh ba iasam lang jong ka India bad ka China, bad u la kdew ba ka India ka kyrmen ba ia ka zero tolerance ia ki kam lehnoh yn pynskhem bha ha ka por jong ka SEO summit lashai ka sngi.
Kham mynshwa ha kane ka sngi, u Jaishankar u la ïakynduh ïa u Vice President ka China u Han Zheng hadien ba u la hiar ha Beijing. Ki arngut ki nongialam ki la iakren ia ki lad ki lynti ban pynskhem ia ka jingiadei. U Vice President ka China u la pynpaw ïa ka jinglong ba kloi ban ïatreilang bad ka New Delhi ban ïoh ïa ka “tango jong u bsein bad u hati”– ka jingshad hapdeng ki mrad ba long dak jong ki– bad u la kdew ba baroh ar ka China bad ka India ki dei ki ri kiba dang kiew ha ka ioh ka kot bad ki dkhot ba kongsan jong ka Global South. U la ong ruh ba baroh ar tylli ki jaitbynriew ki donkam ban pynïaid shakhmat ïa ka jingïatreilang kaba treikam bad ban burom ïa ki jingsngewkhia lang ban pynthikna ïa ka jingroi kaba skhem jong ka jingïadei hapdeng ki arliang mamla.
U myntri bar ri u la ai khublei ruh ia ka China kaba la sdang biang ia ka Kailash Mansarovar Yatra.
