Shillong, Naitung 15
Ka Mawkasiang SC bad ka Laitkroh SC ki la ïoh jingjop ha ka pre-quarter final jong ka SSA 4th Division (U-20) Football League 2025 ha ka Sngi Ba-ar.
Ha ka jingïakhun kaba nyngkong kaba la long ha SSA Stadium Polo, ka Mawkasiang SC ka la pynliem noh ïa ka Lummawbah SC da 2-1 kol.
Wat lada ka Lummawbah ka la ïoh ban pynkhih jar tang mar ïasdang ka jingïalehkai lyngba u Rishan Muktieh (5), hynrei ka Mawkasiang ka la lah ban pynphai kylla lyngba u Hame Dao Nongtdu (25) na ka bynta ban ïakhaid mar shi kol. Kane ka kynhun ka la pynbud biang ïa ka kol ba ar ha ka minit kaba 45 lyngba u Kyrmenskhem Mukhim na bynta ban ïoh jingjop shisyndon.
Haba phai sha kawei pat ka jingïakhun ba ar, ka Laitkroh ka la jop da 3-2 kol ïa ka Mawphlang SC. U Rishailang Myrthong u la thep ar kol ha ka minit kaba 37 & 38 bad kawei pat na u John Edelbert Mawñiuh (66), katba ïa ki ar kol na ka Mawphlang la thep da u Phasdonlang Hynñiewta (11 & 80+5).
