Shillong, Naitung 15
U Nongïalam ka BJP uba dei ruh u Myntri ka Sorkar Jylla, Bah Alexander Laloo Hek, u la pynpaw ba ka seng kan kyrshan ïa ka rai ba ïa mynjurlang ha kaba ïadei bad ka jingjied ïa u MP sha Rajya Sabha.
Kum ka paralok kaba rit bad kaba ïatreilang ha ka Sorkar MDA, u Bah Hek u la ban jur ba ka seng kan sngap ïa ka rai jong ka seng kaba kham heh hapoh ka Meghalaya Democratic Alliance (MDA), kaba ha kane ka khep ka dei ka National People’s Party (NPP) kaba lam khmat.
U la pynshai ba ka jingkyrshan jong ka seng kam dei na ka bynta uno-uno u ‘riewshimet ne ka seng hynrei ka dei na ka bynta ka rai ba ïa mynjurlang kaba mih na ka jingïakren bad kiwei pat ki paralok ba ïatreilang, kiba kynthup ïa ka UDP, BJP, NPP, bad ka kynhun jong kiwei kiba ïasoh bad ka kynhun synrop.
“Kata (jingmihkhmat sha ka Rajya Sabha) ka shong pura ha ka seng heh jong ka kynhun synrop ba ïatreilang. Ngi dei ka seng ïatreilang kaba rit ha ka Sorkar MDA. Kumta ngi hap ban sngap ïa ka jingïasngewthuh jingmut. Kumta kano-kano ka jingïasngewthuh jingmut la ka long ban shim na ka UDP ne HSPDP ne na ka BJP ne na ka NPP ne na kiwei ki kynhun kiba la ïasoh sha ka BJP bad ka NPP, kaba ngi hap ban sngap ïa ki,” la ong u Bah Hek haba ïakren bad ki nongthoh khubor ha ka Sngi Ba-ar.
“Ngim ong ba ngi kyrshan ïano-ïano hynrei ngi ong ba ngi la shim tang ïa ka jingïasngewthuh jingmut lang,” u la bynrap.
