Shillong, Naitung 15
U nongïalam ka BJP uba dei ruh u Myntri Sorkar, Bah A.L. Hek u la ïathuh lypa ba ka seng jong u kan ïalam ïa ka Sorkar ha Meghalaya ha u snem 2028.
Katkum ka jingong jong u, ka seng ka la sdang ïa ka jingpynkhreh bad ka jingtreikam na bynta ka ilekshon 2028 bad ka angnud ban pynlong ïa ka kaba jop.
“Kan dei ka Sorkar ba ïalam da ka BJP ha u snem 2028,” la ong u Bah Hek haba kren sha ki nongthoh khubor ha ka Sngi Ba-ar.
“Ngin ïoh ïa ki kyrtong kiba paka bad ngin ïoh ïa ka kynhun ilekshon kaba khlaiñ ha ka Jylla bad ka BJP kan pynkhreh lypa ïalade, ar-lai snem ha shuwa ka ilekshon,” u la ong.
Haba kylli, u Hek u la ong, “Bad ngi la sdang ruh ïa ka jingpynkhreh naduh mynta, ym tang ha ka por ilekshon. Ka BJP ka trei shitom miet la bad sngi ban pyntikna ba kan seisoh ha ka ilekshon 2028, kaba ngi khmih lynti ba kan long ka Sorkar ba la ïalam da ka BJP.”
Haba ïadei bad ka ilekshon sha ka GHADC ha u snem 2026, u Bah Hek u la ban jur ba ka dei ka kamram jong kano-kano ka seng saiñ pyrthei ban jied ïa ki kyrtong ban ïakhun ïa ki ilekshon.
Halor ka jinglong-jingman jong ka BJP ha ka thaiñ, u la kdew ïa ka jingkiew jong ka seng na 2 ngut ki MP ha u snem 1984 sha palat 200 ngut ki MP mynta.
“Ka dei ka kamram jong kano-kano ka seng saiñ pyrthei ban jied ïa ki kyrtong na bynta kano-kano ka ilekshon. La ka long ïa ka MP, MLA ne MDC ne Municipal, ka seng ka hap ban buh kyrtong ban ïakhun ïa ki ilekshon,” la ong u Bah Hek.
Haba kylli ba ka BJP kam da leh bha haduh katta-katta ha Ri-lum Garo, u la jubab da kaba kylli, “Mano ba la ong ïa phi ba ka long kumta? Ha kano ka rukom phi ong ba ka long kumta?”
“Ka BJP kam don bun ki MDC ha GHADC. Nga kynmaw ha ka por ba ngi dang sdang ïa ka BJP ha u snem 1984, ki don tang 2 ngut ki MP hynrei mynta ngi don palat 200 ngut ki MP ha Parliament. Kane ka dei ka politik. Ngim lah ban ïathuh lypa. Ka BJP ka leh bha ha ka ri baroh kawei. Kane ka jingangnud kan ym jngai shuh na bynta ka Meghalaya bad kiwei-kiwei ki Jylla ka Thaiñ Shatei Lam Mihngi ruh,” u la ong.
Haba jubab ïa kawei pat ka jingkylli, u Bah Hek u la ong, “Lada kam don jingktah ha kawei ne ar tylli ki ilekshon, ngi hap ban long kiba ïaishah khnang ba shisien ka sngi ngin seisoh.”
“Balei ngin shu pyndem? Ka jingshah rem ka dei u mawjam ban poi sha ka jingjop,” u la pynskhem.
