Nongpoh, Naitung 15
Ki pulit jong ka East Guwahati Police District (EGPD) lyngba ka thanat Basistha ki la ïoh ban kem noh ïa ar ngut ki samla na Ri Bhoi District kiba donkti ban tuh ïa kawei ka ar shaka (Honda Activa) kaba don ïa u registration number AS01-EQ-4895.
Kitei ar ngut kiba la shah kem noh ha ka jingpynap shrip kaba la pynlong ha Jorabat ki kynthup ïa u Bicky Lyngdoh, 24 snem ka rta bad u Donald Binan, 24 snem ka rta. Ïa kine baroh ar ngut la ïoh ban kem ha ryngkat bad katei ka ar shaka bad na ka liang ki bor pulit ka jylla Assam ki la pynngat ïa ki hapoh ki kyndon aiñ bad ka jingtohkit mynta ka dang ïaid shakhmat.
