Shillong, Naitung 15
U nongmareh jong ka ri u Fauja Singh, uba la tymmen tam ban pyndep ha ka jingïakop mareh marathon, u la khlad noh na ka jingjia aksiden ha surok ha ka rta kaba 114 snem.
Utei u nongïalehkai, uba sah ha Ilford, kaba don shatei lammihngi jong ka London, u la shah tynrah ha kawei ka kali bad u la mynsaw jur, ha ka por ba u dang pyrshang ban ïaid lyngba ïa ka surok ha ka shnong kaba la kha ïa u, ha Beas Pind, kaba don hajan Jalandhar ha Punjab, ha ka Lah Sngi U Blei, la pynpaw ki khubor.
Ka seng ai jingïarap jong u kaba don ha London, ka ‘Sikhs in the City’, ka la pynthikna ïa ka jingkhlad noh ka jong u bad ka la ong ba ki jingïalang jong ka ki ban sa wan ha Ilford kin long ka jingrakhe ïa ka jingim bad ki jingjop jong u.
U coach jong u Singh, u Harmander Singh, u la thoh ha ka facebook, “Ka long ka khubor sngewsih kaba khraw ba ngi duh noh ïa u Fauja Singh, uba la khlad noh ha India ha ka rta kaba 114 snem.
“U la khlad noh namar ka jingmynsaw na ka jingshah tynrah kali katba u dang ïaid lyngba ïa ka surok kaba don hajan ïing jong u.”
Ka jingthoh ha ka website jong ka Olympic ka ong ba ïa u Singh la kha ha Punjab, ha kata ka por hapoh ka jingsynshar jong ki phareng, ha ka 1 tarik u Ïaïong jong u snem 1911 bad u dei u khun khadduh na ki saw ngut ki khun ha ka longïing kiba im da ka kam rep. U la leit sah sha England bad u la shong la sah ha East London ryngkat bad la u khun hadien ka jingïap noh ka kurim jong u, ka Gian Kaur ha Jalandhar.
Dei haduh u snem 2000, ha ka rta kaba 89 snem, ba u la sdang ban mareh, u la kiew stet sha ka nam da kaba pyndep ïa ka jingmareh kaba nyngkong eh jong u ha London ha ki 6 kynta bad 54 minit. Ha kane ka kynti u la lah ban pyndep ha ki 58 minit ha ka rta kaba 90 snem shaneng.
U Singh u la mareh bun tylli ki jingïamareh, da kaba pyndep ïa ka jingïamareh ha ka Toronto Waterfront Marathon ha u snem 2003 ha ki 5 kynta bad 40 minit, kaba dei ka jingïamareh kaba bha tam jong u shimet. Ha ka 16 tarik u Risaw 2011 ha Toronto, la antad ba u la long u rangbah ba nyngkong eh uba la dap 100 snem ban mareh marathon.
