Shillong, Naitung 15
U Mission Director ka DREAM Project, Bah Francis Kharshiing, u la ong bunsien ki khynnah ki ngop ha u drok namar kim kwah ba ki kmie ki kpa kin sma hynrei kim tip ba shisien ba la ngop ha une u jingdih ka buh jingma ïa ka jingim jong ki.
Ïa kine ki kyntien u Bah Francis u la pynpaw haba ai jingkren hadien ba ki samla pule ki la dep ai jinghikai shaphang kumno ban ïakhun pyrshah ïa u drok kaba la long ha ka Sngi Ba-ar hakhmat dukan Mahari kaba don ha Motphran.
Ïa kane ka prokram la pynlong da ka Lympung Seng Kynthei ha ka jingïatreilang bad ka Drug Reduction Elimination & Action Mission (DREAM) bad ka U-Matter Multipurpose Cooperative.
Ha kane ka prokram ki samla pule na kylleng ka Shillong ki la ïoh ban ai ïa ka drama lyngkot shaphang ka jingngop kawei ka samla kynthei ha u drok bad kane ka samla ka la wanphai sha ïing hadien ba ki bahaïing bahasem ki la leit ban shimti ïa ka haba ka la shong marwei ha jaka paidbah.
U Bah Francis u la ong ki bun ki khynnah samla haba ki leit bamkhana ynda ki la dih ki jingpynbuaid haba ki wan sha ïing ki kmie ki kpa ki lap beit namar ba ki la sma.
Kumta u la ong kine ki samla haba ki kwah ba ki kmie ki kpa kin ym lap ïa ka jingsma ki dih da u drok.
U la ong biang haba dih ïa u drok ar taïew haduh lai taïew ym lap jingsma hynrei kim tip pat ba lada dih ïa une ka pynsniew shuh shuh ïa ka jingim jong ki.
Shuh shuh u la ïathuh ba bun na ki kmie ki kpa ki lehraiñ ban ïathuh briew haba ki lap ba u khun u la ngop ha u drok kumta ka DREAM ka la shna da ka sticker kaba la buh da ka QR Code khnang ba tang shu ‘scan’ kin lap lut ïa ki kyrteng ki jaka ai jingsumar ïa ki.
