Shillong, Naitung 15
Ki Nongïalam jong ka Khasi Students’ Union (KSU) Nongmensong Unit, ha ka Sngi Ba-ar ki la leit ban ïakynduh ïa u Myntri ka tnat Bording, u Abu Taher Mondal, halor ka jingkiew ka bai thang bording ha ki longïing kiba don ha BSUP Housing Complex ha Nongmensong.
Haba kren sha ki lad pathai khubor hadien ka jingïakynduh ïa u Myntri, u President ka KSU Nongmensong Unit, Bah J Pohthmi u la ong, kitei ki longïing kiba don ha katei ka Complex ki la pynpaw ba ka jingkiew ka bai thang bording ilektrik ka dei naduh ba la pyndait da ki Prepaid Smart Meter ha kaba kane ka la ktah shibun eh ïa ki longïing-longsem kiba duna ha ka ïoh-ka kot.
U Bah Pohthmi u la ong ba ha shwa ban pyndait ïa ki Smart Meter, kitei ki longïing ki siew tang kumba T.500 haduh T.600 ka bai thang bording hynrei marsien pyndait ïa ki Smart Meter ka la kiew kynsan ka dor sha ka T. 2,000 ha ka shibnai.
“Kaei kaba ki nongshong wai ki wan ban ud sha ngi ka long kaei-kaei kaba sngewktah shisha namar ba ka bai ïing hangtei kaba ki siew sha ka MUDA kan dei T.900 ha ka shibnai bad ka bai thang bording pat kan poi haduh T. 3,000 haduh T. 4,000, kata te ka long kaei-kaei kaba na ka liang jong ngi ngim lah ban pdiang ïa kata”, ong u Bah Pohthmi.
Nalor kata, u la pynpaw ruh ba ka MeECL ka la pynsangeh ïa ka bording namar ka jingbym lah jong kitei ki nongshong wai ban siew ïa ka bai thang bording kaba heh, kaba la pynlong ïa kine ki longïing ban sah ha ka jingdum ha ka por miet.
“Ngi pynrem jur ruh ïa ka jingleh jong ka MeECL namar ka jingleh torti bad ka jingleh bym kheiñ snep ïa ki paradoh-parasnam jong ngi kiba sah wai hangthie bad kane ka long kaei-kaei kaba ym lah ban pdiang. Ka jingleh jong ki ka long kaba khlem pat phah jingpynbna sha ki nongshong wai ne sha ka shnong,” ong u Bah Pohthmi.
Na ka liang ka seng ka kyntu ïa u Myntri ban tuklar lem halor kane khnang ba kine ki longïing kin ïoh biang ïa ka jingshai bad kyntu ruh ïa u Myntri ban tuklar lem haba ïadei bad ka jingkiew dor ka bai thang bording jong kine ki longïing kaba la wanrah jingeh ïa ki ban siew.
“Ka jingkylli kaba ngi buh hakhmat u Myntri ka long, hato ka Sorkar ka ïuhroit ne ka don kano-kano ka jingthmu ba ki leh ïa kane ka kam? Kaba ar ka long balei ba hap donkam ban shim dor ïa u bai meter kumba T.5 ha ka shisngi? Kaba lai ka long ba lada ka Sorkar ka kwah ban pyntreikam bad khmih ïa une Prepaid Smart Meter, balei ka Sorkar kam pyndait ha manla ki ophis Sorkar ne Colony kiba dei jong ka Sorkar ne ha ki RR Colony ne Goraline ne Punjabi Line? Balei phi wan ñion tang ïa ki paradoh-parasnam jong ngi?,” ong u Bah Pohthmi.
Halor kane, na ka liang u Myntri u la kular ban khmih halor kane ka jingeh bad ong ba un sa khot da ka jingïalang na ka bynta ban ïakren sani bha halor kane ka jingeh jong ki nongshong wai ha katei ka Complex.
