Shillong, Naitung 15
Ki Nongïalam ka Voice of the People Party (VPP) hapoh ka jingïalam jong u President, Bah Ardent Miller Basaïawmoit, MLA ka Nongkrem, ha ka 15 tarik u Naitung, 2025, ki la leit ban jngoh bad jurip ïa ka khlaw Mawpat ne ka ‘Law U Syiem. Ha kane ka jingleit ki la lap ba u maw uba la pynïeng ha ki por ba la dep ban pynlong ‘Law Adong u la jah noh.
Ha kane ka jingleit jurip, la ïadonlang da u Bah Heavingstone Kharpran, MLA ka Mawryngkneng, Bah Brightstarwell Marbaniang, MLA ka Mawlai lem bad ki MDC, ki Rangbah Shnong nalor kiwei-kiwei.
Haba kren sha ki lad pathai khubor, u Bah Ardent u la ong ba ha ka 22 tarik Jymmang, 2014, ka Khasi Hills Autonomous District Council (KHADC) hapoh ka jingïalam jong u kum u CEM lem bad ka Hima Mylliem, ki la ïasoi ïa ka soskular bad mynjur ban pynlong ïa ka ‘Law U Syiem kaba la tip kum ka Khlaw Mawpat kum ka ‘Law Adong bad ban pynïeng da u mawnongrim ha katei ka jaka uba la jah noh bad ong ba ha ka por ba la pynïeng ïa u mawnongrim la buh ruh ïa ki kyndon ban sumar ïa katei ka khlaw hynrei ka khlem shym la treikam satia.
U Bah Ardent u la ong ba ha kane ka jingwan jurip la ïohi ba ki la don shibun ki kam kiba la pyntrei ha kane ka khlaw. Kumta u la buh jingkylli, hato ka Council bad ka Hima ki don jingtip ne em halor ki jingtei kiba la pyntrei mynta ha katei khlaw?
“Kane ka pynlyngngoh ïa ngi lehse, ka dei ka jingleh jong u Syiem Mylliem bad mynta kaba ngi hap ban wad jingtip kum ka seng la ka District Council ka tip ne em ïa kine kiei-kiei ki jinglong-jingman ne ki kam kiba jia ha kane ka khlaw namar kumba ka long, na ka liang ka seng ngin ym shah ba kane ka khlaw kan jot ne kan duh noh namar ngi ïakhun na ka bynta ki longdien-mandien jong ngi,” ong u Bah Ardent.
U la bynrap da kaba ong ba ka jingdon jong kane ka khlaw kan long kum ka jingai sngewbha ïa ki longdien- mandien ban pynneh-pynsah khnang ba kin ïoh ïa ka jingmyntoi hadien-habud.
U la pyntip ba na ka liang ka seng kan sa thoh sha ka District Council ban pan jingshai na u Syiem ka Hima Mylliem bad ban jubab kiei kitei ki jingtei kiba la lap ha ka jingjurip ïa katei ka khlaw.
U la bynrap ruh ba katkum ki jingtip ba la ïoh na ka tyllong kaba tikna ha kaba ki don ki MLA kiba ïoh jaka hapoh ka ‘Law Adong, kumta na ka liang ka seng kan sa phah tohkit bniah da ka District Council na u Syiem ka Hima Mylliem halor kane ka bynta bad ong ba ka seng kan ym ailad satia ïano-ïano kiba don ha ka bor ba kin pyndonkam bakla ïa kane ka khlaw.
