Shillong, Naitung 15
Ka samla Rifiness Warjri kaba long ka kynthei kaba lai ban kiew ïa u lum bajrong tam ha ka pyrthei u Mount Everest, ha ka Lah Sngi U Blei ka la leit ban ai khublei kyrpang ïa ki kmie kha jong ka, kiba dei na ka jait Kharmyndai na ka shnong Laitlarem, Nongspung.
Kane ka jingleit ai khublei katei ka samla ïa ki kmie kha ka dei hadien ba ka la poi sha ka thong jong ka jingjop ha ka jingkiew ïa u Lum Everest.
La sakhi lang ha kane ka sngi da u Sordar jong ka shnong Nongspung Pyllun u Bah John Worth Born Kharmyndai, u Rangbah Shnong jong ka Laitlarem u Bah Tobias Mawlong, ryngkat bad ki seng longkmie ka shnong Laitlarem.
Na ka liang ki kmie kha jong ka samla Rifiness kaba dei ka khun jong u Bah Shlurbor Kharmyndai, ki ka pynpaw ïa ka jingsngew sarong ba ka la lah ban kiew ïa u lum bajrong tang ha ka pyrthei bad ruh ban wanrah ïa ka burom na ka bynta ka kur Kharmyndai ruh kumjuh.
Ha shwa, ka samla Rifiness Warjri, 3 ngut ki samla na Meghalaya kiba la poi sha kliar u lum Everest ba kynthup ïa u Bah Gary Jarman Lamare ha u snem 2012, ka Kong Wansuk Mynthong ha u snem 2013 bad ka Kong Dolyne Kharbhih ha u snem 2013.
