Shillong, Naitung 15
Ka Hynñiewtrep Youths’ Council (HYC) Sengkmie ha ka 15 tarik u Naitung 2025, ka la leit ban khang ïa kawei ka jaka pynïeng kali ha Dhankheti, Shillong kaba don markhap bad ka Woodland Hospital, Shillong hadien ba ki la ïohpdiang ïa ki jingujor na kiba bun ki paidbah ba katei ka jaka pynïeng kali ïa kaba la tip kum ka Parkium INC Parking ka la shim da ka dor kaba kham heh bad kaba la ïapher bak-ly-bak na kiwei ki jaka pynïeng kali kiba don ha Sor Shillong.
Katei ka jaka ka la shim haduh T.65 na ka bynta ki kali saw shaka kiba pynïeng 60 minit bad T.30 na ka bynta ki arshaka kiba pynïeng 60 minit.
Na ka liang ka Seng ha kane ka sngi ka la leit ban khang noh ïa katei ka jaka bad ka la leit ban ïakynduh ïa u trai jong katei ka jaka pynïeng kali bad dawa ruh ba dei ban pynhiar ïa ka dor pynïeng kali namar kane kan buh jingeh ïa ki paidbah kiba wan pynïeng kali bad khamtam eh ïa ki paidbah kiba wan phah sumar ne kiba wan peit nongpang ha Woodland Hospital.
Haba kren sha ki lad pathai khubor, u Nongïalam ka Seng, Samla Enlang Sawïan, u la ong ba kaba lyngngoh ka long ba une u bar jylla uba pynïaid ïa katei ka jaka pynïeng kali u la shu shim palat pud ka dor ban pynïeng ïa ki kali kaba ktah shikatdei eh ïa ki paradoh-parasnam kiba wan donkam ne wan phah sumar ha Woodland Hospital.
“Ngi sngewthuh ba kane ka dei ka jaka jong ki riewshimet bad ngin ym lah ban tuklar than ïa ka dor hynrei ngi la ong ïa u ba ka jingshim palat jong u haduh T.70 ka dei kaei-kaei kaba ym lah ban pdiang. Lada u shim T.30 ne T.40 ka ïaid la ka jong hynrei ban shim haduh katta, kan ktah shisha ïa u paidbah,” ong u Samla Enlang.
Na ka liang ka Seng ka la pyrshang ban ïakren bad u trai jong kane ka jaka pynïeng kali da kaba pan ruh ïa ki kot ki sla ha kaba la lap ba une u trai jong kane ka jaka pynïeng kali u la ïoh ïa ka jingbit ne ka NOC na ka Dorbar Shnong Malki hynrei kaba la pynlong ïa ka Seng ban phah khang shwa ïa kane ka jaka pynïeng kali pat ka dei namar ba kim pat don ïa ka laisen khaïi ne ka Trading License.
Kumta, ka Seng ka la buh ka jingmaham ïa kane ka jaka pynïeng kali ba ka hap ban pynbiang shwa ïa ki kot ki sla bad ban pynduna shwa ïa ka dor jong ka bai pynïeng kali nangta kin sa lah pat ban plie biang ïa katei ka jaka.
