Shillong, Naitung 15
Ka Sorkar Jylla ha ka Sngi Ba-ar ka la rai ban bthah ïa baroh ki trai jong ki kali kamai ba kin wah ne pyndait ïa ki jingtip ba pura jong u nongñiah ïa ka kali kamai jong ki.
Ki trai jong ki kali ki dei ban wah ne pyndait ïa ka jingtip ba pura jong u nongñiah ba ñiah ïa ka kali hadien ka jaka shong (Seat) jong u nongñiah kata naduh ka kyrteng, ka dur, license, jaka sah, phone number bad kiwei-kiwei.
Kane ka hukum ka kynthup ïa baroh ki jait kali kamai kiba shim jingbit na ki District Transport Officers (DTO) ban kamai ha baroh kawei ka Jylla Meghalaya, kata ba kynthup naduh ki taksi, ki kali kamai Tourist, ki Bos, ki Sumo.
Ïa kane la pyntip da u Myntri ba khmih ïa ka tnat Jngohkai u Bah Paul Lyngdoh hadien ba la wai ka jingïalang bad u Symbud Myntri Rangbah ba khmih ïa ka tnat Transport u Bah Sniawbhalang Dhar.
Haba kren sha ki lad pathai khubor, u Bah Paul u la ong ba kane ka rai ka dei ban pynthikna ïa ka jingshngaiñ ki paidbah bad kumjuh ruh ki nongwan shangkai pyrthei (Tourist) kiba wan kai sha ki bynta bapher bapher jong ka Meghalaya.
U Bah Paul u la ong ba ïa kane ka jingbthah sha ki trai jong ki kali kamai bad ki nongñiah kali kamai la leh ruh sha kiwei ki Jylla ka Ri India ban ai jingshngaiñ ïa ki briew kiba shong ha ki kali khamtam ha ka por mynmiet.
“Kane ka hukum kan treikam ha baroh kawei ka Jylla Meghalaya na ka bynta baroh ki kali kamai khnang ba ki paidbah, ki nongwan shangkai pyrthei (Tourist) kiba wan kai bad leit kai sha kylleng ka Jylla khamtam ha ka por miet kin sngew shngaiñ,” la ong u Bah Paul.
