Mawkyrwat, Naitung 15
Kum shi bynta ban ai mynsiem shuh-shuh bad ban pynshlur ruh ïa kiwei ki para samla ha ki kam ïalehkai, ki khynnah skul barim jong ka Nativity Higher Secondary School Alumni Association hapoh ka jingïalam jong u Bah Kynpham Kharlyngdoh kum u President ryngkat ki dkhot, ha ka Sngi Ba-ar ki la pynkup burom ïa ka samla Banrihun Lyngdoh kaba dei napoh kane ka skul kaba na Mawkyrwat, South West Khasi Hills District.
Kum ban shu kdew, ka samla Banrihun Lyngdoh, 17 snem ka rta, ka dei kaba dang pule ha ka klas 9 hapoh ka skul Nativity bad ka dei ka samla kaba la ïoh ban khur ar tylli ki takma ksiar ha ka rynsan ïakhun kti ha ka liang kamon bad kadiang ha ka National Arm Wrestling Championship 2025 ba la pynlong da ka Kerala Arm Wrestling Association.
U Bah Kynpham haba ai jingkren u la pynpaw ïa ka jingsngewkmen kaba khraw ïa ka samla Banrihun Lyngdoh kaba la wanrah nam bad wanrah burom ïa ka skul, ka dong ka thaiñ bad ïa ka Jylla baroh kawei.
U la ai ruh ka kitbok-kitrwiang bad buh ruh ka jingkyntu ïa ka samla Banrihun ba kan nang trei shitom shuh-shuh ha ki por ban dang wan khnang ba kan lah ban ïashim bynta bad wanrah jingjop sa ha ki rynsan ïakop ki ban long shabar ri kumjuh.
Ha kane ka sngi la sakhi lang naduh u Prin-cipal ka Nativity Higher Secondary School, Fr. Alfonsius Wahlang, ka Sister Sabina Mawïong, Headmistress, samla Daw -ningstar Marweiñ, Bah Kordor Kharlyndoh, ki nonghikai lem bad ki khynnah skul.
