Aizawl, Naitung:
Ka Karunya Institute of Technology and Sciences (ba la ñiew ba ka dei ka skulbah), kaba don ha tduh jong ka Western Ghats, ka la rakhe ïa ka Convocation Ceremony kaba 31 ha ka 12 tarik, Naitung, 2025, ha ka rukom kaba ishongkun bad ka jingsngew sarong ha kaba ïadei bad ka pule-puthi.
Ha kane ka sngi, ïa kane ka jingleh burom la pynphuh pynphieng da u Myntri Rangbah ba donburom jong ka jylla Mizoram, u Lalduhoma, uba la long kum u kongsan bad la pynkup ïa u da ka Degree of Doctor of Letters (Honoris Causa) kum ka jingithuh ïa ka jingshakri paidbah kaba long ka nuksa bad ka jinglong nongïalam kaba don ka jingïohi jngai.
Ha ka por ba u la ai jingkren, u Lalduhoma u la ai ka jingïaroh ïa ka Karunya kum ka nuksa jong ka jingpule kaba la pynlong da ka jingngeit bad ka jingkiew ha ka juk stad saïan, da kaba kyntu ïa ki samla pule ba kin ailad ïa ka jingthmu ban ïalam ïa ka jingim jong ki bad ban trei kum ki nongïalam jong ka jingkylla kaba bha.
U Chancellor, u Dr. Paul Dhinakaran, ha ka jingai jingkren jong u, u la pynpaw ïa ka jinglah jong kane ka skulbah ban ïaid shahkhmat ha ka jingkyntiew bad ka jingkylla lyngba ka dor jong ka jingnang jingstad.
Nalor kane, u la pynshlur ïa ki samla kiba la pyndep ïa ka jingpule ban long ki nongïalam kiba don ka akor bad ki nongpynkylla, da kaba pynïasoh lang ïa ka jing-tbit ha ki kam jong ki bad ka jingsngewrit na ka bynta ka pyrthei sawdong jong ki. U la pynïaid ruh halor ka jingai ïa ki Degrees, Medal bad ki jingpynkup burom ba kham kyrpang.
Napdeng ki nongïoh khusnam da ka Chancellor kiba la ïoh jingithuh na ka bynta ki jingjop ba pawnam jong ki ha ka pule puthi bad ha ka jinglong ba pura jong ki ki long ka Tara Ann Lukose (B.Tech. Computer Science and Engineering), B. Beulah (B.Tech. Electronics and Communication Engineering), Gethsia P (M.Tech. Computer Science and Engineering), Bartika Maitra (B.A. Criminology), bad A. Reni (B.Sc. (Hons.) Agriculture), ha kaba man iwei pa iwei ki la lah ban pynmih ïa la ki jong ki jingshemphang, ha ka jingwad bniah, ka jingpynthymmai, ka jinglong nongïalam bad kiwei pat ki jinglah jong ki ha ka imlang-sahlang.
Kane ka jingïalang ka la long ka jingpynpaw ïa ka kam jong ka Karunya ha ka ban pynsan ïa ki samla ha ka kyrdan Graduate ha ka jinglong, ka jingtbit, bad ka jingsngewrit, ban pynkhreh ïa ki ban ai ki jingnoh synñiang kiba don jingmut sha ka ri bad ka pyrthei.
