Sdang hiar ka um ha Pung Umïam; kyrmen u Myntri ban wan biang ka jinghap u slap

Ka jingkiew ha ka jingdon jong ka um kan shong ha ka jinghap jong u slap uba ngi ïoh ha kane ka aïom slap", ong u Myntri.

Shillong, Naitung 15

U Myntri ba dei khmih ïa ka tnat Bording ka Sorkar Jylla, u Abu Taher Mondal, u la pynpaw ïa ka jingsngewkhia halor ka jinghiar ka um ha pung Umïam kaba lah ban wanrah ka jingthut ha ka ban pynmih bording na kane ka jaka pynmih bording.

Haba kren sha ki lad pathai khubor ha ka Sngi Ba-ar, u Myntri u la ong ba haba ym don um, ka long shisha kaba sngewkhia da kaba pynpaw ïa ka jingkyrmen ba ka jinghap slap kan wan biang kham kloi khnang ba ka pung kan dap biang.

U Myntri u la ong ba ka jingdon ka um mynta ha pung Umïam ka dang biang hynrei ka jinglong-jingman ka lah ban kylla, kaba shong eh ha kane ka aïom lyiur. U la ong ba um tip haduh katno kane ka aïom lyiur kan ïaid bad lada don ka jinghap slap, yn sa lah ban ïoh shibun ka um ka ban ym ktah pat ïa ka jingpynmih bording ilektrik kham hadien.

“Lada ka aïom lyiur ka biang bad ka um ruh ka don, ka jingpynmih bording ka dang kiew hynrei lada ka aïom lyiur ka duna ka mut ka jingdon ka um ruh kan duna kaba lah ban ktah beit ïa ka jingpynmih bording.

Ka jingkiew ha ka jingdon jong ka um kan shong ha ka jinghap jong u slap uba ngi ïoh ha kane ka aïom slap”, ong u Myntri.

Haba jubab ïa ka jingkylli, u Mondal u la ong ba ka jingpyllait ïa ka um na ka jaka kan ym don namar ba ka um ka la hiar haba ki pynmih bording.

U la pynkynmaw ruh ba ha ka snem ba la dep ha ka por ba duna ka um, ka Jylla ka la lah ban pynbiang bording namar ba ka um ka kiew.

U Mondal u la bynrap ruh da kaba ong ba ka dang kloi palat ban ïathuh lypa kaei ka ban jia bad ong ba haduh mynta, ka jinglong-jingman ka dang lah ban teh lakam.