Aizawl, Naitung:
Ka Sorkar Mizoram ka dang pyrshang ban lum ïa ki jingtip ba bniah halor ka Biometric bad ka jingbun jong palat 35,000 ngut ki phetwir na Myanmar kiba shong shnong ha kane ka jylla, ong u heh ophisar na ka Tnat Pohïing.
U heh ophisar u la ong ba ka jingpynrung kyrteng la khmih lynti ba kan sdang ha ka taïew ba khatduh jong u bnai Naitung.
U la bynrap ba ïa ka jingpynrung kyrteng yn leh da kaba shu Online da kaba pyndonkam ïa ka Foreigner Identification Portal bad yn pynlong nyngkong ha ki sor bad ki shnong kiba don ka Internet kaba biang.
U la ong ba baroh ki phetwir na Myanmar, kynthup ïa kito kiba la wan rung dang shen hadien ka jingïaleh pyrshah hapdeng ki kynhun lehnoh Chin ha ka Jylla Chin, kin shah kynthup.
U heh sorkar u la kdew ba ka sorkar ka la buh kyrpang T. 38 lak na ka bynta kane ka jingpyntreikam, ïa kaba yn bei tyngka da ka sorkar pdeng. Yn mang pisa shuh lada donkam, u la bynrap.
U la kdew ba ka Offline Mode ruh ka lah ban donkam, namar ba bun ki phetwir ki sah ha ki jaka ba jngai bad ki bym biang ka jingpynïasoh Internet.
Ïa ka jingpynrung kyrteng Biometric yn pynlong da ki bor synshar distrik ba la khlieh da ki Deputy Commissioner, ïa kiba yn pynbiang ïa baroh ki tiar ba donkam, u la ong.
Ki heh sorkar ki la ïathuh ba palat 35 hajar ngut ki phetwir na Myanmar mynta ki dang shong rieh tngen ha ki jaka bapher bapher jong ka jylla, ha kaba ka Champhai distrik ka dei ka jaka kaba bun eh.
Hynrei ka jingdon jong ki phetwir ka kylla la jan man ka sngi, namar ba ki don ki nong Myanmar kiba la leit phai biang sha ki shnong ha Myanmar ki ju leit biang sha Mizoram, ki la ong.
