Shillong, Naitung 15
Ki shipai Border Security Force (BSF) ka 22 Bn ha ka 14 tarik mynta u bnai ki la ïoh ban bat ïa 26 ngut ki nong Bangladesh kiba la rung tuh sha India ryngkat bad 4 ngut ki nong India kiba ïarap ïa ki bad la ïoh ruh ban kurup ïa ki kali ba ki pyndonkam.
Ki BSF Meghalaya Frontier mynta ka sngi ki la ïathuh ba ïa kine la ïoh ban bat noh ha ka por ba ki dang pyrshang ban jam sha shiliang na ka jaka khappud kaba don ha West Garo Hills district.
Kane ka la jia ha Matchokpara hajan ka surok ha kaba ki BSF ki la peit thuh bha ïa 3 tylli ki kali kiba wan na ka phang Purakhasia bad thmu ban leit sha Barengapara lyngba ka surok SH-12.
Ki bor pahara haba ki la lap ba don ki nong Bangladesh ha kitei ki kali, mar-mar ki la bat ïa ki. Ïa kine la aiti noh sha ki pulit ka Jylla ban leh ïa kaba donkam.
