
Nongpoh, Naitung 15
Bun tylli ki ïing ki sem bad ki jingthung-jingtep ki la julor ha ki ar tylli ki shnong ba kynthup ïa ka Umdap Dumu bad Umdap Rngi, kiba hap hapoh ka Umling C&RD Block, Ri Bhoi District, hadien ka jingwan lynshop kynsan jong ka ‘erïong ha ka janmiet jong ka 14 tarik mynta u bnai.
Kumba la ïohi lyngba ki dur khih, ka jingwan lynshop jong ka ‘erïong ka la pynkhyllem ïa ki hajar tylli ki dieng kwai, ki diengbah nalor ki post ilektrik, ki jingthung-jingtep bad ruh ka jingjulor ba sangsot ïa ki ïing ki sem.
Haba ïakren bad katto-katne na ki nongshong shnong jong kitei ar tylli ki shnong kiba mad ïa katei ka jingwan lynshop jong ki bor ka mariang, ki la pynpaw ïa ka jingsngewdiaw bad jingsngewsih kthang halor ka jingduhnong kaba khraw kaba ki la mad na ka jingshah lynshop ha ka ‘erïong.
Haba ïoh ban ïakren bad u Bah Alexander Maring, Rangbah Shnong ka Umdap Rngi bad u Bah Angelius Maring, Rangbah Shnong ka Umdap Dumu, ki la ïathuh ba kane ka dei ka sien ba nyngkong ba ka ‘erïong ka wan ban lynshop ïa kitei ar tylli ki shnong bad wanrah ïa ka jingduhnong kaba khraw ïa ki paidbah nongshong shnong.
Kumba kiba bun na ki nongshong shnong hi ki dei ki nongrep, ka jinglynshop jong katei ka ‘erïong ka la wanrah ïa ka jingïam paid dohnud bad kthang mynsiem namar ka jingduh noh ïa ki jingthung-jingtep kiba ai jingkyrshan ïa ki ba kin pynbit-pynbiang ïa ka ïing ka sem bad kiba kum ki nongrep hi ki shaniah tylli tyllan ha kaba ïadei bad ka ïoh ka kot.
Halor kane ka bynta, na ka liang kitei ki nongïalam shnong, ki la buh ka jingkyrpad sha ki bor Sorkar ba kynthup ïa ka Umling C&RD Block ba kin phai khmat bad shimkhia ban ai ïa ki lad jingïarap ïa ki longïing kiba mad ïa ki jingshah pynjulor ha kane ka jingwan lynshop ka ‘erïong bad ruh sha u MLA bad ka MDC ka Nongpoh ba kin ïarap ban pynïoh lem ïa ki lad jingïarap khnang ba kitei ki longïing sa shisien kin lah ban sdang biang ïa ka jingim bathymmai.