Shillong, Naitung 15
Ka Meghalaya Wrestling Association (MWA) ha ryngkat ka jingïatrei bad ka Meghalaya State Olympics Association (MSOA) lem bad ka Sportality, ka la pynlong ïa ka prokram ai jinghikai ba la tip kum ka ‘International High Performance Wrestling Camp’ kaba la sdang naduh 11 tarik bad ka la poi sha kaba kut ha ka 15 tarik mynta u bnai ha Anton Hall kaba ha Laitumkhrah Shillong.
Ha kane ka prokram la wan ai jinghikai da u coach na Japan u Yoshimaro Yanagawa bad uba la lah ban sei ïa ki nongïalehkai ïalympat kiba la khur takma ha Olympics na katei ka ri. La don lang ruh ha kane ka prokram ai jinghikai kaba saw sngi lynter da ar ngut ki ‘thei ïalympat na Japan; kita ka Sakura Motoki kaba la khur takma ksiar ha ka Olympic bad ka Ami Ishii kaba long ka lahduh ha ka pyrthei.
Na ka liang u President ka Meghalaya Wrestling Associa-tion, Bah Isaiah Kharmaw-phlang u la pynpaw ba ka jingwan jong utei u coach na Japan lem bad ki nongïalehkai ba kynsai jong katei ka ri ka la long ka jingkyrkhu kaba khraw ïa ki khynnah ïalehkai ka Jylla khamtam haba ka Jylla kan pynlong ïa ka 39th National Games ha u snem 2027.
Kumta u la khmih lynti ba ki khynnah ka Jylla kin nangkiew shaphrang ha kane ka jait jingïalehkai kaba dang thymmai hapoh ka Jylla. “Ïa ka Meghalaya Wrestling Association la seng ha u snem 2022 bad ka jingkhmih lynti ka long ban kyntiew ïa kane ka jingïalehkai.”
“Kam long kaba suk ban ïoh takma noh ha ki lympung ïalehkai (National Level), hynrei kan shim por kumba 10 snem eiei ba ngin ïoh takma ha ka National Games namar donkam ban ïoh ka jinghikai naduh mynba dang khynnah. Kumta lyngba ka jingwan jong utei u coach kan long ka jingïarap ïa ki khynnah ïalehkai ka Jylla ba kin long kiba ïaryngkat bor bad ki nongïalehkai na kiwei pat ki Jylla jong ka ri India,” u la bynrap.
Shuh shuh, u Bah Isaiah u la ong ba ka Jylla kam pat ju don kum ki freestyle wrestling, hynrei ka don tang ki belt wrestling bad traditional wrestling lyngba ka jingpaw ki nongïalehkai. “Te kumta ngi donkam ban pynshlur ïa ki nongïalehkai ha ka Free Style Wrestling khnang ba kin nang mih ki nongïalehkai kiba kynsai.”
