Shillong, Naitung 15
U ‘rangïalehkai shapdeng ka England, u Jordan Henderson, u ban jur ba u dang lah ban kiew shaphrang ha ka Premier League, hadien ba u la pynïasoh sha ka Brentford kum uba laitluid ha ka Sngi Ba-ar, hadien ba u la mih noh na ka kynhun ïalehkai kaba na Nether-lands, ka Ajax.
U Henderson u la mynjur ïa ka jingïateh soskular kaba ar snem bad katei ka klob namar ba u la wanphai biang sha ka Premier League hadien ba u la mih noh na ka Liver -pool ha u snem 2023. “Hadien ar snem ba nga la jngai nga dang don kata ka ding kaba shit rhem ban wanphai biang bad ban ïalehkai biang ha ka Premier League,” ong une u ‘rangïalehkai ba la 35 snem ka rta.
“Ka paw shai ba ka dei ka lympung kaba bha tam ha ka pyrthei, kaba don ki nongïalehkai kiba tbit. Kumta ka dei ka jingeh kaba khraw hynrei ka dei kawei kaba nga thrang ban leh. Haba la ailad ïa nga da ka Brentford bad hadien ba nga la ïakren bad ka klob ka la kylla long ka rai kaba suk. Baroh ar tylli ki klob ki don shibun ki jingmut na ka bynta jong nga. Nga sngew kit ram shibun eh ïa ka Sunderland bad nangta ka Liverpool ka la long ka bynta kaba khraw ha ka jingim jong nga,” u la bynrap.
“Hynrei haba nga ïalehkai pyrshah ïa ki ym don paralok, ngi tip ïa kata ha ka phutbol.”
U Manager bathymmai ka Brentford, u Keith Andrews, u la phaikhmat sha u Henderson, hadien ba u la duh noh ïa u rangïalehkai shapdeng na Denmark, u Christian Norgaard uba la leit ïasoh sha ka Arsenal.
“Haba ngi la tip ïa ka jingdon jong u Jordan, ka dei ka rai kaba suk bha”, la ong u Andrews.
“Ngi la leh ïa ka jingwad bniah jong ngi ha kylleng ki jingïalehkai ba dangshen jong u ban ïohi shano u don. U dang long uba koit ba khiah bha bad u dang don ka jingangnud kaba phylla ban jop ïa kiei-kiei ha ka jingïalehkai, hadien ba u la jop shibun kiei-kiei.”
“Da ka jingbym don ki nongïalehkai ba la tbit kiba la mih noh na ka kynhun kum u Christian Norgaard, Mark Flekken bad u Ben Mee – ka la long kaba kongsan ban bujli ïa kata.”
“Kaei kaba u Jordan un wanrah ka long ba u la long uwei na ki nongïalam ba kongsan ha ki snem ba mynta jong ka Premier League. U la long uba hakhmat eh ban ïakhun ïa ki nam lahduh bad ki jingïakhun ha ka klob ïalehkai phutbol.”
U Henderson u la ïalehkai haduh 84 sien ïalehkai ha ka England bad dangshen u la shah khot biang ha u Thomas Tuchel, coach ka England.
Kum ban shu pynkynmaw, u Henderson u la pynlut 12 snem bad ka Liverpool, ha kaba u la jop ïa ka Champions League ha u snem 2019 bad ka Premier League ha u snem 2020 nalor kiwei pat ki trophy kiba bun, shwa ba un leit sha ka klob jong ka Saudi Arabia, ka Al-Ettifaq ha ki ar snem mynshwa.
