Shillong, Naitung 16
Ka Umlyngka SC ka la pynjem khnap haduh 5-1 kol ïa ka Imson SC, katba ka Mawkriah West SC ïa ka jop da 2-1 kol ïa ka Laitlyngkot SC ha ka lympung ïalehkai SRGT 3rd Division Football league 2025 ba la pynïaid da ka Shillong Sports Association ha ka Sngi Balang.
Ha ka jingïalehkai jong ka Group-B kaba la long ha SSA Stadium kaba ha First Ground, Polo, ka Umlyngka ka la lah ban ïalehkai bha naduh kaba sdang ha kaba ka la ïoh ban pynkhih jar nyngkong eh lyngba u Samborlang Nongbsap (5), kumjuh u Mario Shanpru (24) bad u Anthony Kharkongor (43) na ka bynta ban tam lai kol ha ka kylla step.
Hadien katto-katne por ba la bteng ïa ka jingïakhun jong ka kylla miet, ka Imson ka la pynphai kylla shi kol lyngba u Gregorious Biam (51) hashwa ba ka Umlyngka kan la thep biang sa ar kol lyngba u Andy Nongkhlaw (70) bad u Rodonald Kharbuki (72).
Ha kawei pat ka jingïalehkai jong ka Group-D, ka Mawkriah West SC ka la pynliem noh ïa ka Laitlyngkot SC da 2-1 kol.
Haba phai sha ka jingïalehkai kham ha shwa jong ka Group-B hapdeng ka Lumparing SC bad ka Rynjah SC ki la ïakhaid mar 3-3 kol.
