Shillong, Naitung 16
U Myntri ka Sorkar Jylla, Bah Kyrmen Shylla u la ban jur halor ka jingdonkam ban don ka jingïatreilang ban ïakhun pyrshah ïa ka jingjyllei jong u drok ha ka Jylla.
Katkum ka jingong jong u, ka jingeh halor u drok ka dei kaba hap ban shimkhia ym tang ha ka Jylla hynrei wat ha kylleng ka ri bad ka pyrthei baroh kawei.
Haba kren sha ki nongthoh khubor ha ka Sngi Balang, u Bah Shylla u la ban jur ba ka long kaba donkam eh ïa ki ‘riew shimet, ki longïing, bad ki shnong ki thaw ban ïatylli lang bad ban kyrshan ïa kito kiba shah ktah ha ka jingkyrni jong ka jingdih drok.
U la ai jingïaroh ïa ka jingtrei shitom jong ki Dorbar Shnong ha ki shnong bapher-bapher, kiba la trei minot ban ïada na ka jingkyrni ha ki kam dih drok hapdeng ki samla.
U Bah Shylla u la kdew ruh ïa ka bynta jong ki MLA – ban wanrah ïa ki kam ïalehkai bad kiwei-kiwei ki sienjam ban pynïadon bynta ïa ki samla bad ban ïada ïa ki ban lait ngop ha u drok. U la ai khublei ruh ïa ki jingpyrshang jong ki tnad treikam ka Sorkar, kynthup ïa ki tnad pulit bad ka tnad ka koit ka khiah, ha kaba ïakhun pyrshah ïa ka jingma jong u drok.
Da kaba ban jur ïa ka jingdonkam jong ka jingïamir jingmut bad ka jingkyrshan ïa ki ‘riew shimet lem bad ki longïing kiba shah ktah ha u drok, u Myntri u la kyntu ïa ki paidbah ba kin ym buhrieh ne lehraiñ ïa ki dkhot bahaïing kiba ïakhun pyrshah ïa ka jingkyrni, hynrei ban ai jingkyrshan bad ïarap ïa ki ban jop ïa ki jingeh jong ki.
“…lada don kiba pyndonkam drok ha ka ïing ka sem jong nga, nga hap ban pynsngew ïa kane, lada nga buhrieh, te kata kan nangroi ha ka ïing ka sem bad hadien-habud kan long kaba jwat ban leh eiei na bynta jong u ban jop ïa u drok. Kumta ngi hap ban kyrshan bad ban don ryngkat bad ki, ha kajuh ka por ngim dei ban lehraiñ ïa la ki bahaïing bahasem lada ki pyndonkam ïa u drok, kumta kane ka dei ka jingkyrpad jong nga,” u la pynpaw.
Haba kylli, u Bah Shylla u la kdew ba watla ki jaka talasi ki long kiba donkam ha ka ban khang ïa ka jingrung jong u drok, hynrei kim dei tang ma ki ka lad ban weng ïa ki jingeh. U la ai nuksa ïa ki ri kum ka USA, kiba watla ki don ïa ki rukom buddien kiba khlaiñ, hynrei ki dang mad jingeh ban ïakhun pyrshah ïa ki kam dih drok.
U Shylla u la ban biang ba ka jingpyrshang lang na baroh ki nongshim bynta ka long kaba donkam ban ïakhun pyrshah ïa ki jingsniew ba ïadei bad u drok.
Shuh shuh, u Bah Shylla u la ban jur halor ka jingdonkam ban buh ïa ki CCTV na bynta ka jingshngaiñ jong ki nongjngohkai pyrthei bad ki nongshong shnong ha ka Jylla. U la kdew ba watla ka long kaba kongsan ban don ïa ki CCTV, hynrei ka jingeh ka shong ha ka ban pynïaid bad pyntreikam bha ïa ki kam ki jam.
Na ka liang u Myntri u la ai jingmut ba ka Integrated Command Control System kan long kaba myntoi, khamtam ha ki jaka kum ha Ri-lum Jaiñtia.
Nalor kane, u la ban jur ba ka jingpyndait ïa ki CCTV kam dei tang ka kamram jong ka Sorkar, hynrei jong ki ‘riew shimet bad ki kam khaïi. U la kdew ba bun ki briew ki la pyndait ïa ki CCTV ha ki ïing ki sem bad ki dukan jong ki na bynta ka jingshngaiñ, bad ba ka jingpyrshang lang jong baroh kan long kaba donkam ban pyntikna ïa ka jingshngaiñ jong ki nongshong shnong bad ki nongjngohkai pyrthei.
