Shillong, Naitung 16
Ar ngut ki shipai Border Security Force (BSF) ki la mynsaw na ka jingshah thombor ha ki suba nongkhaïi masi tuh ha khappud jong ka India-Bangladesh ha East Jaiñtia Hills.
Katkum ka khubor la ong ba kane ka jingjia, ka la jia hajan jong ka wah Khasimara ha ki por dang step jong ka 12 tarik mynta u bnai.
Katkum ka ejahar ba la ujor sha ki pulit ka Meghalaya, ka kynhun jong ki shipai BSF ka la lap ïa ka jingïaid lynti ba suba jur jong ki nongkhaïi tuh kiba don kumba 20 ngut eiei bad kiba dang ïalam ïa kumba 30 haduh 40 tylli ki masi sha khappud.
La ong ba ha ka por ba ki BSF ki la ïakhun ïa ki, kane ka kynhun la kynnoh, kaba la synran bad ïarap sa kumba 40 bad 50 ngut ki briew shimet na shiliang jong u pud, ki la pyrshang ban rung jubor sha u pud jong ka India bad sdang ruh ban kawang da ki maw ïa ki shipai ap pahara.
La ong ba ha ka jingïaleh, ar ngut ki shipai BSF ki la mynsaw. Ha kaba ïadei bad kane bad haba pynphai kylla, ki BSF ki la siat pynma sha suiñ da ka jingthmu ban pynpra ïa ka jinglum briew.
Ha kane ka jingïaleh, ki nongthombor ha kaba kut ki la phet krad noh bad na kane ka jaka, ki shipai BSF ki la ïoh ban kurup 13 tylli ki masi.
Ka kyrwoh khubor na ki BSF ka la ong ba ka jinglong-jingman ka la long kaba jai-jai bad ka jingtohkit halor kane, mynta ka la ïaid shakhmat.
