Imphal, Naitung:
Ki shipai pahara bad ki pulit ki la kem ïa khyndai ngut ki briew na kiba bun ki kynhun ba ju ïarap ïa ki kynhun lehnoh kum shi bynta jong ka jingpyntreikam kaba dang ïaid shakhmat ban ïaleh pyrshah ïa ki lehnoh bad ban pynneh ïa ka jingsuk ha Manipur, la ïathuh ki pulit ha ka sngi Ba-ar.
Katkum ka jingong jong ki pulit, ki briew kiba la shah kem ki donkti ha ki kam dawa pisa kiba thmu ïa ki nongtrei sorkar, ki jaka theh umphniang, ki nongpynïaid ïa ki kali, ki jaka pule, bad ki nongkhaïi ha kylleng ki jaka jong ka them.
Ha kane ka jingkhynra, ki bor pahara ki la kurup ïa kawei ka kali ar shaka, khyndai tylli ki Mobile Phone kiba don ïa ki Sim Card kiba ïadei, ki tiar kiba beaiñ bad T. 4,050 ka pisa.
Ki heh pulit ki la kem ïa u Moirangthem Gandhi Singh (34), Mutum Anand Meitei (37), bad Athokpam Lelin (43), kine baroh ki dei ki dkhot jong ka kynhun ba la shahñiew beaiñ ka Kangleipak Communist Party-Meeyamgi Feengang Lanmee (KCP-MFL), ha Thangal Bazar ha Imphal City bad Hapta Kangjeibung ha Imphal East.
Ki pulit ki la ïoh ban kem ruh ïa u Thokchom Ibungo Singh (32) bad u Singam Kabikanta Meitei (33) jong ka KCP (Apunba City Meitei) na ka shnong Kumbi bad Thoubal ha ka bynta ba shaphang Shathie jong ka them Manipur.
Ha ka jingkhynra kaba kyrpang, ki bor pahara ki la ïoh ban kem ïa u Moirangthem Suresh Singh (39) bad u Soram Kameshor Singh (46) baroh arngut kiba dei ki dkhot jong ka Kanglei Yaol Kanna Lup (KYKL) kaba la shah ñiew beaiñ.
Ki bor pahara ki la kem ruh ïa u Koijam Naobi (29) uba dei u dkhot jong ka Revolutionary People’s Front na Leirongthel Pitra kaba hap hapoh jong ka Nongpok Sekmai Police Station ha Thoubal distrik.
