Shillong, Naitung 16
Ka MP barim ka Lok Sabha na Tura Parliamentary Constituency bad kaba dei mynta ka Chairperson jong ka Meghalaya State Commission for Protection of Child Rights (MSCPCR), ka Agatha Sangma ka la kyntait ban ong eiei halor ka jingsaphriang ki khubor hamsaïa ba ka lah ban dei ma ka kum kyrtong na ka bynta ka shuki MP Rajya Sabha ka Jylla bad ong ba ïa mynta kam pat shym la don kano-kano ka jingïakren hapoh ka National People’s Party (NPP) halor ka jingjied MP na ka Jylla ban mihkhmat sha ka Rajya Sabha.
Haba kren sha ki lad pathai khubor ha ka Sngi Balang jong ka 16 tarik u Naitung 2025, ka Agatha ka la ong ba kane ka dei tang ka khubor hamsaïa da kaba bynrap ba kam pat lah ban ong eiei halor kane ka bynta mynta.
Ka Agatha ka la ong ruh ba ka rai baroh ka shong ha ka Seng ban jied ïa u ne ka kyrtong bad na ka liang jong ka, kan ai ka jingkyrshan kaba radbah ïa uno-uno ne kano-kano ban long MP Rajya Sabha ka Jylla.
“Ïa mynta ngim pat don kano-kano ka jingïakren halor ka shuki Rajya Sabha hynrei kine ki dei tang ki khubor hamsaïa, kumta ngam lah ban ong eiei halor kane hynrei kaei kaba nga lah ban ong ka long ba kaei kaba ka Seng jong nga ka rai, ngan ai ka jingkyrshan kaba radbah,” ong ka Agatha.
Haba kylli, hato kan leh kumno lada ka kyrteng jong ka, ka paw hakhmat, ka Agatha ka la ong ba kam pat lah ban batai eiei mynta ne ban ong eiei halor kata.
“Kumba nga lah dep ban ong, kata ka dei ka rai jong ka Seng bad kam dei jong nga hynrei ngan kyrshan beit ïa ka rai jong ka Seng,” bynrap ka Agatha.
