Shillong, Naitung 16
U Bah Pynshngaiñ Rattane uba dei Presi-dent ka United Karbi People’s Organisation (UKPO) kaba dei ka seng ki Khasi kiba sah ha Karbi Anglong u la ong ba ki Khasi kiba sah ha Karbi ki shah iehbeiñ ha ki kam pynroi ha ka Sorkar Assam, kumta kiba sah ha khappud ki kwah ban hap beit ha Meghalaya.
Haba ïakren bad u Bah Pynshngaiñ u la pynpaw ba ki paidbah ki pdiang beit ïa kaei kaba ka Sorkar Meghalaya bad Assam ki rai hynrei kito ki shnong Khasi kiba sah ha khappud ki kwah ban hap sha Meghalaya.
U la ong ba ki Khasi Pnar kiba sah ha khappud ki kwah ban leit sha Meghalaya ka dei namar ka jingñiew shiliang ka Sorkar Assam bad Karbi Autonomous District council.
U la ong ba ki Khasi ki duh jingkyrmen haba ki sah ha Assam namar ki ñiew shiliang khmat, kumta kito kiba sah ha Block-1 bad Block-2 ki kwah ban hap sha Megha -laya ha kane ka jingïa-pynbeit pud ka Meghalaya bad Assam.
Haba phai sha jingjia ha Lapangap, u la ïathuh ba ka jingmih ka huri-hura ka dei namar ki don ki briew kiba nabar khappud kiba sah ha Diphu kiba leit pynkulmar hynrei ki briew kiba sah ha khappud ki dei kiba shongsuk.
