Guwahati, Naitung:
Da kaba phai khmat ha kaba ïadei bad ka ilekshon ha Assam ha u snem 2026, u President ka All India Congress Committee (AICC) u Mallikarjun Kharge bad u Rahul Gandhi u nongïalam jong ka seng ki la poi ha Guwahati ha ka 16 tarik, Naitung.
Kumba la khmih lynti, hashwa, la ong ba kine haba ki poi ha kane ka jylla kin ïakren bad ki nongbud jong ka seng ha kiba bun ki jingïalang. “U Kharge bad u Rahul kin ong ïa ki paidbah ka Assam ‘Daro Mat.’ Ka ka la don ka jingleh bymhok ïa ki briew. Ka seng Congress ka don bad ki bad kan ïakhun na ka bynta ka jinglait luid ka sur,” la ong u Gogoi.
“U Myntri Rangbah ka jylla u Himanta Biswa Sarma u sheptieng. U la ai shibun ki jingkren shaphang ka jingshim jaka (na ki nongwan rung jubor). Hynrei ma u bad katto katne ngut ki Myntri jong u ki long trai ïa ka jaka kaba heh bha,” la kynnoh u Gogoi.
Ha kane ka bynta, u la kdew katto katne ki jaka, kynthup ïa ka jaka sah ha ka jaka ïaid jong ki hati, ki kper slasha bad ka hotel.
U la kynnoh ba la seng ïa ki karkhana ha ki jaka rep da kaba pynkheiñ ïa ki aiñ kiba la don lypa, bad 18,000 akar ka jaka kaba dei jong ki trai ri trai muluk, ki riewlum bad ki jaitbynriew rit paid la ai sha ki briew kiba nabar ka Assam.
“Ki paidbah kim don ka jingshngaiñ ha ka khyndew ka shyiap. Ka Congress kan ïakhun na ka bynta jong ki. Kan don ka jingïakhun”, la ong shuh shuh u Gogoi.
U nongïalam ka seng u Ripun Bora u la ong ba u Kharge bad u Gandhi ki la leit sha Assam da kaba pyrkhat ïa ka ilekshon 2026.
U la ong ba ki arngut ki la bishar bniah ïa ka jingpynkhreh jong ka seng ïa ka ilekshon.
“Ka AICC ka long katkum ka jingkordor kaba khraw tam ïa ki ilekshon ha Assam. Ka don ha ka rukom ilekshon 8 bnai shwa ka ilekshon”, la ong u Bora, u President barim ka Congress ha ka jylla.
U la ong ba kitei ki arngut ki nongïalam kin ai jingkren ïa ki nongbud ka seng, ban pynkhlaiñ bad ai mynsiem ïa ki, bad da kum kane ka jingai mynsiem, ka Congress kan leit sha ki jaka thep vote.
U Bora u la kynnoh ba ka BJP, kaba khlieh ïa ka kynhun synrop synshar jong ka jylla, ka sngew syier halor ka jingwan jngoh jong u Kharge bad u Gandhi.
“Khlem pep kan don ka jingïakhun bad ka Congress kan sa thaw ïa ka sorkar ban wan.Ki nongtrei ka Congress baroh ki don ka mynsiem”, u la bynrap shuh shuh.
