Washington, Naitung:
U Secretary General jong ka NATO, Mark Rutte, u la maham ha ka Sngi Ba-ar ba ki ri kum ka Brazil, China bad ka India, ki lah ban shah ktah jur bha ha ka jingpynjari kyndon arsien, lada ki dang ïai bteng ban ïatreilang bad ka Russia.
U Rutte u la kren ïa kane ha ka por ba u ïakynduh ïa ki heh nongïalam ka Congress jong ka US ha ka sngi hadien ba u President Donald Trump u la pynbna ïa ki tiar thma thymmai na ka bynta ka Ukraine bad u la byrngem ruh ban pynngat khajna 100% ïa ki nongthied ïa ki mar ba shalan shabar ri jong ka Russia lymda don ka jingïasoi soskular ïasuk hadien 50 sngi.
“Ka jingpynshlur jong nga ïa kine lai tylli ki ri khamtam ka long, lada phi sah mynta ha Beijing, lane ha Delhi, lane phi dei u President jong ka Brazil, phi hap ban bishar bniah ïa kane, namar kane ka lah ban ktah jur ïa phi hadien,” ong u Rutte ha ki nongthoh khubor, uba la ïakynduh ïa u Trump ha ka Sngi Nyngkong bad mynjur ïa ki sienjam ba thymmai.
U Senator Republican jong ka US, u Thom Tillis, u la ïaroh ïa u Trump, halor ka jingpynbna ïa kitei ki sienjam, hynrei, u la ong ba katei ka jingpynslem kaba 50 sngi, ka “pynkhuslai” ïa u.
U la ong ba u sngewkhia ba “U Putin un pyrshang ban pyndonkam ïa ki 50 sngi ban jop ïa ka thma, lane ban kham don ha ka kyrdan kaba kham bha ban ïakren ïa ka jingïasoi soskular ïasuk hadien ba u la pynïap dusmon ïa ki mynsiem briew ba lui-lui ha Ukraine bad ka la nang ailad ïa ka Russia ba kan nang lah ban leit kurup shuh-shuh ïa ki bynta jong ka Ukraine.”
