Shillong, Naitung 16
Ka Kong Beauty Mary Jyrwa ka nongujor halor ka jingïoh ïa u Pizza boi ksaiñ na ka dukan kaba don ha Khyndailad kaba kyrteng ka Broadway Bread And Cafe ha ka Sngi Balang ka 16 tarik u Naitung 2025, ka la ïoh biang ïa ka pisa ba ka la thied ïa utei u jingbam.
Ka Kong Beauty kaba dei na ka thaiñ Mawngap, East Khasi Hills District ha ka Sngi Balang ka la ïoh biang ïa ka pisa na ka trai jong katei ka dukan hadien ba ka la kyrpad da kaba shu ïakren lyngba ka phone.
Lyngba ka jingïakren na ka phone la ïohsngew ba katei ka trai dukan jong ka Broadway Bread And Cafe ka la pynpaw ïa ka jingsngewsih bad panmap, bad ka la kular ba kan siew noh ïa ka bai lutksan jong ka.
Hadien kumba katto-katne minit eiei ka la pynpoi ïa ka pisa sha katei ka longkmie da kaba siew ‘online’ lyngba ka ‘Google Pay’.
Kum ban shu kdew hangne ba ka Kong Beauty Jyrwa ha ka 05 tarik u Naitung 2025 ka la buh da ka jingmudui ha Commissionerate of Food Safety pyrshah ïa katei ka dukan hadien ba ka la lap ïa ki ksaiñ hapoh u jingbam Pizza.
Ka la ong ba ka la phah song ar tylli ki jingbam Pizza na katei ka dukan bad uwei u ruti heh bad ynda ka la poi ha ïing ban ai ïa ki khun ba kin bam, hynrei ka khun baheh jong ka ka la ïohi ïa ka jingkhih hapoh utei u jingbam bad la shem pynban ba u dei u jingbam ba la boi ksaiñ.
Halor kane ka jngmudui jong ka Kong Beauty Jyrwa na ka liang ka tnat Food Safety ka la khot hajir ïa ki trai dukan ha ki sngi ba la dep ban pynshai bad kumjuh ïa katei ka longkmie da kaba ka la ïathuh ba ka tnad kan pynïaid ïa kine katkum ki kyndon aiñ.
